وزیراعظم شہباز شریف کا آئندہ ہفتے اہم ممالک کا دورہ، بھارت کا مکروہ چہرہ بے نقاب کرنے کا اعلان

اسلام آباد: (نیا محاذ) وزیراعظم شہباز شریف آئندہ ہفتے اہم سفارتی دوروں پر روانہ ہوں گے، جن کا مقصد علاقائی صورتحال، دو طرفہ تعلقات اور بھارتی جارحیت کو عالمی برادری کے سامنے بے نقاب کرنا ہے۔
ذرائع کے مطابق وزیراعظم کے مجوزہ دورے میں ترکیہ، آذربائیجان، سعودی عرب، قطر، متحدہ عرب امارات اور ایران شامل ہوں گے۔ ان ممالک کے ساتھ سفارتی، تجارتی اور دفاعی تعلقات کو مزید وسعت دینے کے لیے تیاریوں کا آغاز کر دیا گیا ہے۔
دوست ممالک کو بھارتی الزامات سے آگاہ کیا جائے گا
ذرائع کا کہنا ہے کہ وزیراعظم اپنے ان اہم دوروں کے دوران بھارت کی حالیہ اشتعال انگیزیوں اور بے بنیاد الزامات کو دوست ممالک کے سامنے رکھیں گے۔ بھارتی قیادت کے بیانات اور جارحانہ رویے کو عالمی سطح پر بے نقاب کیا جائے گا تاکہ دنیا کو خطے کی اصل صورتحال سے آگاہی حاصل ہو۔
خطے میں امن کے لیے پاکستان کا مؤقف
ان دوروں کے دوران وزیراعظم پاکستان کا مؤقف پیش کریں گے کہ خطے میں پائیدار امن، مذاکرات اور تعاون سے ہی ممکن ہے۔ پاکستان نے ہمیشہ امن کو ترجیح دی ہے مگر اپنی خودمختاری اور سلامتی کے تحفظ پر کوئی سمجھوتہ نہیں کرے گا۔