واشنگٹن: (نیا محاذ) امریکی ریاست انڈیانا میں واقع پرڈیو یونیورسٹی کے انجینئرنگ کے ہونہار طلبا نے ایک شاندار کامیابی حاصل کرتے ہوئے روبوٹ کے ذریعے نیا عالمی ریکارڈ قائم کر دیا۔ اس روبوٹ نے صرف 0.103 سیکنڈ میں روبک کیوب کو حل کر کے گنیز ورلڈ ریکارڈ میں اپنا نام درج کروا لیا۔
دلچسپ بات یہ ہے کہ یہ وقت انسانی آنکھ کی جھپک سے بھی تیز ہے، کیونکہ آنکھ عام طور پر 200 سے 300 ملی سیکنڈ میں جھپکتی ہے۔ اس سپر فاسٹ روبوٹ کا نام “پرڈوبکزکیوب” (Purdubik’s Cube) رکھا گیا ہے، جسے پرڈیو یونیورسٹی کے الیکٹریکل اور کمپیوٹر انجینئرنگ کے طلبا جونپی اوتا، ایڈن ہرڈ، میتھیو پیٹرو اور الیکس برٹا نے مل کر تیار کیا۔
یہ روبوٹ مئی 2024 میں روبک کیوب حل کرنے کے سابقہ عالمی ریکارڈ کو توڑنے میں کامیاب ہوا، جو جاپانی کمپنی مٹسوبیشی الیکٹرک نے 0.305 سیکنڈ کے ساتھ قائم کیا تھا۔ نئے ریکارڈ نے پرانی رفتار کو تقریباً تین گنا پیچھے چھوڑ دیا۔
“پرڈوبکزکیوب” جدید ترین موٹرز اور انتہائی حساس سینسرز سے لیس ہے، جو کیوب کے تمام رنگوں اور حصوں کو فوری اسکین کرتا ہے اور تیز ترین حل نکالتا ہے۔ اس حیرت انگیز کامیابی کو جدید ٹیکنالوجی اور انجینئرنگ تعلیم کا عملی مظاہرہ کہا جا رہا ہے۔
یہ سنگ میل نہ صرف روبک کیوب کے شوقین افراد کے لیے حیران کن ہے بلکہ انجینئرنگ کی دنیا میں بھی ایک نئی راہ کھولنے کا اشارہ دے رہا ہے۔
0
