پاک فوج کا کاری وار: صرف 5 گھنٹوں میں بھارت کا جنگی غرور خاک میں ملا دیا

اسلام آباد: بھارتی جارحیت کے خلاف پاکستان نے نہایت موثر اور فیصلہ کن ردعمل دیتے ہوئے صرف پانچ گھنٹوں میں دشمن کی دفاعی صلاحیتوں کو شدید دھچکا دیا۔ پاک فوج کے بے مثال آپریشن نے بھارت کو میدان، فضا اور سائبر اسپیس میں شکست سے دوچار کر دیا۔
ذرائع کے مطابق پاکستانی مسلح افواج نے بھارت کے اہم فوجی اور فضائی اہداف کو کامیابی سے نشانہ بنایا، جن میں ادھم پور، پٹھان کوٹ، سرسا، برنالہ، بھٹنڈا، آدم پور، اکھنور، جموں، سورت گڑھ، سسرام، ہلوارا، مامون ایئرفیلڈز اور براہموس میزائل سٹوریج سائٹ شامل ہیں۔
جدید ٹیکنالوجی اور پیشہ ورانہ مہارت کا منہ بولتا ثبوت
آئی ایس پی آر کے مطابق پاک فضائیہ کے JF-17 تھنڈر طیاروں نے آدم پور میں موجود بھارت کے جدید ترین S-400 ایئر ڈیفنس سسٹم کو تباہ کر دیا، جس کی مالیت 1.5 ارب ڈالر تھی۔ اس کامیابی نے بھارت کی فضائی برتری کے تمام دعوے ختم کر دیے۔
سائبر میدان میں پاکستان کی مکمل سبقت
پاکستانی سائبر ماہرین نے بی جے پی سمیت متعدد بھارتی حکومتی ویب سائٹس ہیک کر لیں، جن میں کرائم ریسرچ انویسٹی گیشن ایجنسی، مہانگر ٹیلی کمیونیکیشن کمپنی، ہندوستان ایروناٹکس، بارڈر سیکیورٹی فورس، آدھار اتھارٹی اور 2500 نگرانی کیمروں کا کنٹرول شامل ہے۔ اس کے علاوہ بھارت کا 70 فیصد بجلی کا نظام بھی مفلوج کر دیا گیا، جس سے پورے نظام میں شدید خلل پیدا ہوا۔
بری، فضائی اور سائبر محاذ پر زوردار ضربیں
پاک فوج نے دہر نگیاری میں بھارتی آرٹلری یونٹس کو تباہ کیا، ناگروٹا میں براہموس میزائل اسٹوریج اور اڑی کا سپلائی ڈپو بھی نشانے پر رہا۔ بھمبر گلی (IIOJK) میں بھارتی بریگیڈ ہیڈکوارٹرز کو مکمل طور پر مٹا دیا گیا۔
لائن آف کنٹرول پر دشمن کی چوکیوں کا صفایا
پاکستانی افواج نے نیزہ پیر سیکٹر میں دشمن کی پوسٹس جیسے دھرم سال 1، دانہ 1 اور ٹیبل ٹاپ پوسٹس کو کامیابی سے تباہ کر کے کنٹرول لائن پر بھارتی اثر و رسوخ کو شدید کمزور کر دیا۔
بھارتی جنگی قوت کو فیصلہ کن پیغام
اس پانچ گھنٹوں کے آپریشن نے ثابت کر دیا کہ پاکستان نہ صرف زمینی جنگ بلکہ الیکٹرانک اور سائبر وارفیئر میں بھی فیصلہ کن برتری رکھتا ہے۔ یہ جوابی کارروائی پاکستان کی دفاعی صلاحیت اور ردعمل کی رفتار کا واضح ثبوت ہے۔
پاکستان کا دوٹوک پیغام
پاکستان نے دنیا پر واضح کر دیا ہے کہ کسی بھی جارحیت کا جواب فوری اور بھرپور انداز میں دیا جائے گا۔ پاک فوج مکمل چوکنا اور کسی بھی خطرے سے نمٹنے کے لیے پوری طرح تیار ہے۔