ڈونلڈ ٹرمپ کا دعویٰ: “اب میں نہ صرف امریکہ بلکہ دنیا بھی چلا رہا ہوں”

نیا محاذ: واشنگٹن — سابق امریکی صدر ڈونلڈ ٹرمپ نے دعویٰ کیا ہے کہ اپنی دوسری مدت صدارت کے دوران وہ نہ صرف امریکہ بلکہ پوری دنیا کو چلا رہے ہیں۔
امریکی جریدے “دی اٹلانٹک” کو دیے گئے ایک انٹرویو میں ٹرمپ نے کہا کہ ان کی دوسری مدت صدارت پہلی مدت کے مقابلے میں کافی مختلف ہے۔ انہوں نے کہا کہ پہلی بار انہیں ملک چلانے کے ساتھ ساتھ اپنی بقا کی بھی جنگ لڑنی پڑی کیونکہ اردگرد کرپٹ عناصر موجود تھے۔ اب، ان کے بقول، وہ نہ صرف ملک بلکہ دنیا کے معاملات بھی سنبھال رہے ہیں۔
ڈونلڈ ٹرمپ نے کہا کہ جو کام وہ کر رہے ہیں وہ انتہائی سنجیدہ نوعیت کا ہے لیکن اس کے باوجود وہ اسے انجام دیتے ہوئے لطف اندوز ہو رہے ہیں۔ انٹرویو سے قبل انہوں نے اپنے سوشل میڈیا پلیٹ فارم “ٹروتھ سوشل” پر طنزیہ انداز میں کہا تھا کہ وہ یہ جاننے کے لیے “دی اٹلانٹک” کو انٹرویو دے رہے ہیں کہ آیا یہ میگزین سچ بولنے کی صلاحیت رکھتا ہے یا نہیں۔
سابق صدر نے مزید کہا کہ دوسری مدت میں وہ خود کو زیادہ طاقتور محسوس کرتے ہیں۔ ان کے بقول، اب ان کی انتظامیہ وفادار افراد پر مشتمل ہے اور عدالتی نظام کے ساتھ ان کا رویہ بھی پہلے سے زیادہ جارحانہ ہو چکا ہے، کیونکہ بعض اوقات عدالتیں ان کے ایجنڈے کی راہ میں رکاوٹ بنتی ہیں۔