نیا محاذ: لاہور — قومی کرکٹ ٹیم کے سابق کپتان شاہد آفریدی نے کہا ہے کہ پہلگام واقعہ بھارت کا ایک بڑا ڈرامہ ہے اور ان کی نیت پہلے ہی پاکستان سے کھیلنے کی نہیں تھی۔ نیشنل ہاکی سٹیڈیم کے دورے کے دوران میڈیا سے گفتگو کرتے ہوئے شاہد آفریدی نے کہا کہ پہلگام واقعے پر غور کیا جائے تو یہ صرف ایک ڈرامہ نظر آتا ہے، کیونکہ یہ کیسے ممکن ہے کہ نامعلوم افراد ایک گھنٹے تک کارروائی کرتے رہیں اور بھارت کی 8 لاکھ فوج وہاں نہ پہنچے۔
آفریدی نے مزید کہا کہ بھارت اپنے لوگوں کو خود مروا کر پھر خود ہی زندہ کر دیتا ہے۔ انہوں نے کہا کہ پاکستان نے ہمیشہ بھارت کے ساتھ اچھے تعلقات بنانے کی کوشش کی ہے لیکن بھارت کی طرف سے ہمیشہ منفی جواب ملا ہے۔
سابق کرکٹر نے یاد دلایا کہ 2016 میں ٹی20 ورلڈکپ کے دوران، حالات کشیدہ ہونے کے باوجود پاکستانی ٹیم بھارت گئی تھی، اور ہمیں خود بھی نہیں معلوم تھا کہ ہمیں وہاں جانا چاہیے یا نہیں۔ آفریدی نے کہا کہ اگر بھارت نے کرکٹ کے تعلقات ختم کرنے ہیں تو وہ سب کچھ بند کر دیں، نہ کہ صرف کرکٹ کو بند کیا جائے۔
پاکستان سپر لیگ (پی ایس ایل) کے حوالے سے شاہد آفریدی نے کہا کہ جنہوں نے پی ایس ایل کا آغاز کیا تھا، انہیں ہی اس کا سلسلہ جاری رکھنا چاہیے تھا۔ انہوں نے مزید کہا کہ فرنچائز مالکان مالی نقصان کا شکوہ کر رہے ہیں، حالانکہ کچھ فرنچائز مالکان نے فائدہ بھی اٹھایا ہے۔
شاہد آفریدی نے محمد رضوان پر تنقید کرتے ہوئے کہا کہ جب انہوں نے جنوبی افریقا کو شکست دی تھی، تو انہوں نے یہ نہیں کہا تھا کہ ان کے ہاتھ میں کچھ نہیں تھا، اور جب انہیں کپتان بنایا جاتا ہے تو انہیں بہانے نہیں کرنے چاہیئیں۔
قومی کھیل ہاکی پر گفتگو کرتے ہوئے آفریدی نے کہا کہ آج کل گراؤنڈز اور کھیل تباہی کا شکار ہیں۔ انہوں نے اس بات پر افسوس کا اظہار کیا کہ ہماری اسپورٹس منسٹری قومی کھیل کی طرف توجہ نہیں دے رہی۔ تاہم، انہوں نے وزیراعظم شہباز شریف سے امید ظاہر کی کہ وہ ہاکی پر توجہ دیں گے۔
0
