کاکول (نیا محاذ) – پاکستان ملٹری اکیڈمی کاکول میں کیڈٹس کی پاسنگ آؤٹ پریڈ کی پُروقار تقریب منعقد ہوئی، جس میں سیاسی و عسکری قیادت سمیت غیر ملکی مہمانوں نے بھرپور شرکت کی۔ تقریب کے مہمانِ خصوصی وزیراعظم میاں محمد شہباز شریف تھے، جبکہ چیف آف آرمی اسٹاف جنرل سید عاصم منیر کو “نشانِ امتیاز (ملٹری)” کے ساتھ بطور گیسٹ آف آنر مدعو کیا گیا۔
تقریب میں وزیر دفاع خواجہ آصف، وزیر اطلاعات عطا اللہ تارڑ، اعلیٰ سول و عسکری حکام، غیر ملکی سفارتکار اور کیڈٹس کے اہل خانہ نے شرکت کی۔ آرمی چیف جنرل عاصم منیر کو تقریب میں آمد پر سلامی دی گئی، جبکہ بگل کی آواز کے ساتھ وزیراعظم شہباز شریف کی آمد کا اعلان کیا گیا اور انہیں بھی گارڈ آف آنر پیش کیا گیا۔
وزیراعظم شہباز شریف نے پریڈ کا معائنہ کیا اور کیڈٹس کی حلف برداری تقریب میں شرکت کی۔ اس موقع پر انہوں نے بہترین کارکردگی کا مظاہرہ کرنے والے کیڈٹس میں اعزازات بھی تقسیم کیے۔
اعزازی شمشیر انڈر آفیسر محمد حنان ملک کو دی گئی، جبکہ صدارتی طلائی تمغہ انڈر آفیسر زین العابدین نے حاصل کیا۔ چیئرمین جوائنٹ چیفس آف اسٹاف کمیٹی کا اوورسیز گولڈ میڈل نیپال کے کیڈٹ کو دیا گیا۔ لیڈی کیڈٹ لائبہ رحمان اور انڈر آفیسر محمد طلحہ ایاز کو بھی نمایاں کارکردگی پر اعزازات سے نوازا گیا۔
اپنے خطاب میں وزیراعظم شہباز شریف نے پاس آؤٹ ہونے والے کیڈٹس کو مبارکباد دی اور کہا کہ ان کی یہ شمولیت پاکستان کی اُن مسلح افواج کا حصہ بننے کی علامت ہے جو نظم و ضبط، قربانی اور قومی یکجہتی کی اعلیٰ مثال ہیں۔ انہوں نے کہا کہ یہ ادارے بانی پاکستان قائداعظم محمد علی جناح کے اصولوں پر عمل پیرا ہیں اور قومی سلامتی کے ضامن ہیں۔
وزیراعظم نے اس تقریب کو اعزاز قرار دیتے ہوئے کہا کہ پاکستان کی مسلح افواج نے ہمیشہ ملک کی سلامتی اور خودمختاری کا دفاع کیا ہے، اور آج کے یہ نوجوان کیڈٹس اسی عزم و وفا کے ساتھ میدانِ عمل میں اُتر رہے ہیں۔
0
