دبئی (نیا محاذ) – متحدہ عرب امارات نے مستقبل کی جانب ایک اور بڑا قدم اٹھاتے ہوئے چہرے کی شناخت پر مبنی بائیومیٹرک سسٹم متعارف کرانے کی تیاری شروع کر دی ہے، جو آئندہ سالوں میں ایمرٹس آئی ڈی کی جگہ لے سکتا ہے۔
اماراتی وزیر صحت و تحفظ، اور وزیر مملکت برائے فیڈرل نیشنل کونسل امور عبدالرحمان العویس نے بتایا کہ یہ نیا نظام مصنوعی ذہانت (AI) کی بنیاد پر کام کرے گا، جس میں فیشل ریکگنیشن اور فنگر پرنٹس شامل ہوں گے۔ ان کا کہنا تھا کہ اس نظام کو آئندہ ایک سال کے اندر پورے ملک میں نافذ کیا جا سکتا ہے۔
اس جدید نظام کے تحت امارات کے شہری اور رہائشی حکومتی خدمات سے لے کر ایئرپورٹ پر سفر تک کی تمام سہولیات صرف اپنا چہرہ اسکین کروا کر حاصل کر سکیں گے، جس سے نہ صرف وقت کی بچت ہو گی بلکہ سکیورٹی اور سہولت میں بھی نمایاں اضافہ ہوگا۔
فی الحال یہ سسٹم ابوظہبی اور دبئی ایئرپورٹس پر جزوی طور پر فعال ہے۔ زاید انٹرنیشنل ایئرپورٹ پہلے ہی حکومتی ڈیٹا بیس کے ذریعے مسافروں کی شناخت کر رہا ہے جبکہ دبئی ایئرپورٹ پر ’’سمارٹ ٹنل‘‘ نامی ٹیکنالوجی چند سیکنڈز میں پاسپورٹ کنٹرول مکمل کرنے کی صلاحیت رکھتی ہے۔
متحدہ عرب امارات کا یہ قدم ووٹنگ، سرکاری سروسز اور ایئرپورٹ انٹری جیسے شعبوں میں شناخت کے عمل کو تیز، محفوظ اور زیادہ مؤثر بنانے کی جانب ایک انقلابی تبدیلی ہے۔
0
