نیامحاذ – لاہور: پی ایس ایل 10ایچ بی ایل پاکستان سپر لیگ (پی ایس ایل) سیزن 10 کے لیے میچ آفیشلز کے ناموں کا باضابطہ اعلان کر دیا گیا ہے۔ ٹورنامنٹ کے دوران 13 امپائرز اور 7 میچ ریفریز فرائض انجام دیں گے۔
ایونٹ 11 اپریل سے 18 مئی تک جاری رہے گا، جس میں آئی سی سی ایلیٹ پینل سے تعلق رکھنے والے تجربہ کار امپائرز احسن رضا، پال رائفل اور کمار دھرما سینا شامل ہوں گے۔ اس کے علاوہ الیکس واف اور کرس براؤن بھی امپائرنگ پینل کا حصہ ہوں گے۔
پاکستان سے علیم ڈار، آصف یعقوب، فیصل خان آفریدی، راشد ریاض اور وقار بھی امپائرنگ کی ذمہ داریاں نبھائیں گے، جبکہ پی سی بی ایلیٹ پینل کے عبدالمقیت، ناصر حسین، طارق رشید اور ذوالفقار جان بھی امپائرز پینل کا حصہ ہوں گے۔
پی سی بی کے مطابق علیم ڈار کے لیے یہ ان کا آخری پی ایس ایل سیزن ہوگا، جس میں وہ بطور امپائر اپنی خدمات انجام دیں گے۔
میچ ریفریز کی فہرست میں آئی سی سی ایلیٹ پینل کے رکن رنجن مدوگالے اور سری لنکن سابق کرکٹر روشن مہاناما شامل ہیں، جبکہ علی نقوی اور محمد جاوید ملک بھی ریفری کی حیثیت سے موجود ہوں گے۔
مزید برآں، افتخار احمد، اقبال شیخ اور ندیم ارشد بھی آفیشلز کے طور پر اس ایڈیشن میں شامل ہیں۔
ایچ بی ایل پی ایس ایل 10 کرکٹ شائقین کے لیے ایک بار پھر دلچسپ اور سنسنی خیز مقابلے پیش کرنے جا رہا ہے، جس میں تجربہ کار آفیشلز کا شامل ہونا ایونٹ کے معیار میں اضافے کا باعث بنے گا۔
0
