نیامحاذ – اسلام آباد:شہباز شریف سے امریکی وفد کی ملاقات، وزیراعظم محمد شہباز شریف سے امریکی محکمہ خارجہ کے اعلیٰ سطحی وفد نے ملاقات کی، جس میں پاکستان کے معدنی شعبے میں سرمایہ کاری کے فروغ پر تفصیلی تبادلہ خیال کیا گیا۔
امریکی وفد کی قیادت بیورو آف ساؤتھ اینڈ سینٹرل ایشین افیئرز کے سینئر بیورو افسر اور قائم مقام اسسٹنٹ سیکرٹری نے کی۔ وفد “پاکستان منرلز انویسٹمنٹ فورم 2025” میں شرکت کے لیے پاکستان آیا ہے۔
وزیراعظم شہباز شریف نے امریکی وفد کا خیر مقدم کرتے ہوئے کہا کہ پاکستان کے معدنیات کے شعبے میں سرمایہ کاری کے وسیع مواقع موجود ہیں۔ انہوں نے امریکی کمپنیوں پر زور دیا کہ وہ اس ترجیحی سیکٹر میں سرمایہ کاری کو ترجیح دیں۔
انہوں نے مزید کہا کہ پاکستان، امریکا کے ساتھ دوطرفہ تعلقات کو مضبوط بنانے کے لیے پرعزم ہے، خاص طور پر تجارت، سرمایہ کاری اور انسداد دہشتگردی جیسے شعبوں میں تعاون میں اضافے کا خواہاں ہے۔ وزیراعظم نے خطے میں امن و سلامتی کے لیے امریکا کے ساتھ مشترکہ کوششوں کی اہمیت پر بھی زور دیا۔
ملاقات کے دوران قائم مقام اسسٹنٹ سیکرٹری ایریک میئر نے پاکستان منرل انویسٹمنٹ فورم کے کامیاب انعقاد پر حکومت پاکستان کو مبارکباد دی اور کہا کہ امریکی کمپنیاں پاکستان کے معدنی شعبے میں سرمایہ کاری میں سنجیدہ دلچسپی رکھتی ہیں۔
ایریک میئر نے اس بات کا اعادہ کیا کہ امریکہ پاکستان کے ساتھ دوطرفہ تعلقات کو مزید فروغ دینے کا خواہاں ہے اور مشترکہ دلچسپی کے شعبوں میں تعاون کے لیے پرعزم ہے۔
ملاقات میں نائب وزیراعظم و وزیر خارجہ محمد اسحاق ڈار، وفاقی وزیر اقتصادی امور احد خان چیمہ، وزیر پٹرولیم علی پرویز ملک، معاون خصوصی طارق فاطمی اور دیگر اعلیٰ حکام بھی شریک تھے۔
0
