نیامحاذ:ڈونلڈ ٹرمپ نے ٹک ٹاک کی امریکا میں پابندی ،امریکی صدر ڈونلڈ ٹرمپ نے چینی شارٹ ویڈیو شیئرنگ ایپلیکیشن ٹک ٹاک پر امریکا میں پابندی کو دوسری بار ملتوی کرتے ہوئے اس کی مدت میں مزید 75 دن کا اضافہ کر دیا ہے۔
امریکی نشریاتی ادارے کے مطابق، امریکا میں ٹک ٹاک کو دی گئی اضافی 75 دن کی مہلت 5 اپریل کو مکمل ہونے والی تھی، جس کے بعد ڈونلڈ ٹرمپ نے ایپلیکیشن کو مزید 75 دن کی مہلت دے دی۔
صدر ٹرمپ نے ’ٹرتھ سوشل میڈیا‘ پر اپنی پوسٹ میں بتایا کہ ٹک ٹاک کی فروخت کے معاملات ابھی تک مکمل نہیں ہو سکے، اس لیے اس پر پابندی کی مدت میں مزید 75 دن کا اضافہ کیا جا رہا ہے۔
ٹرمپ نے واضح کیا کہ اب ٹک ٹاک کو جون کے وسط تک امریکی سروسز کسی بھی امریکی شہری یا کمپنی کو فروخت کرنا ہوں گی، ورنہ ایپ کو امریکا میں بند کر دیا جائے گا۔ اس سے قبل صدر ٹرمپ نے عندیہ دیا تھا کہ وہ ٹک ٹاک پر پابندی کی مدت کو دوبارہ بڑھائیں گے۔
امریکی حکومت نے ٹک ٹاک کو قومی سلامتی کے لیے خطرہ قرار دیتے ہوئے قانون بنایا تھا کہ اس کی امریکی سروسز کسی امریکی شہری یا کمپنی کو فروخت کی جائیں، ورنہ ایپ امریکا میں بند کر دی جائے گی۔
واضح رہے کہ مذکورہ قانون 20 جنوری 2025 کو نافذ العمل ہو چکا تھا، تاہم نئے صدر ڈونلڈ ٹرمپ نے اس وقت ٹک ٹاک پر پابندی کے قانون کو 75 دن تک منسوخ کیا تھا، جو 5 اپریل کو مکمل ہو رہی تھی، مگر صدر نے اسے دوبارہ مزید 75 دن کی مہلت دے دی۔
