اسلام آباد (نیا محاذ) – جے یو آئی ف کے رہنما سینیٹر کامران مرتضیٰ نے کہا ہے کہ سلمان اکرم راجا کی اتحاد سے متعلق بات ایسی نہیں جو ساتھ چلنے یا ساتھ چلانے والے دوستوں کے لیے موزوں ہو۔
نجی ٹی وی جیو نیوز کے پروگرام میں گفتگو کرتے ہوئے کامران مرتضیٰ کا کہنا تھا کہ ممکن ہے ہم اسٹیبلشمنٹ سے ہاتھ ملانے کی خواہش کے بغیر آگے بڑھنے کا سوچ رہے ہوں۔ انہوں نے مزید کہا کہ ہم نہ اپنی بارگیننگ پوزیشن بڑھانا چاہتے ہیں اور نہ کسی اور کی۔
دوسری جانب، پی ٹی آئی کے رکن اسمبلی اور چیئرمین پبلک اکاؤنٹس کمیٹی جنید اکبر نے کہا کہ ان کی جماعت چاہتی ہے کہ مولانا فضل الرحمان پی ٹی آئی کے ساتھ چلیں، تاہم دونوں جماعتوں کے درمیان کچھ تحفظات موجود ہیں۔ ان کا کہنا تھا کہ تحفظات کو دور کرنے کے لیے عمران خان سے ملاقات میں دونوں جماعتوں کا مؤقف ان تک پہنچایا جائے گا۔
گزشتہ روز اڈیالہ جیل کے باہر میڈیا سے گفتگو میں جنید اکبر نے اسٹیبلشمنٹ سے رابطوں کا اعتراف کرتے ہوئے کہا کہ ہم یہ کبھی نہیں کہیں گے کہ ہمارے اسٹیبلشمنٹ سے کوئی رابطے نہیں، یہ بالواسطہ اور بلاواسطہ ہوتے ہیں۔
انہوں نے مزید کہا کہ اداروں سے رابطے رکھنے میں کوئی شرم کی بات نہیں کیونکہ یہ ہمارے ہی ادارے ہیں۔ ان کا کہنا تھا کہ عوام اور اداروں کے درمیان فاصلے نہیں بڑھنے چاہئیں، پی ٹی آئی کسی سے نہیں ٹکرائی بلکہ ہمارے ساتھ لوگ ٹکرائے ہیں۔
سیاسی حلقوں میں اس بیان کو اہم پیش رفت قرار دیا جا رہا ہے، کیونکہ اس سے یہ عندیہ ملتا ہے کہ پی ٹی آئی اور جے یو آئی ف کے درمیان ممکنہ مذاکرات کے دروازے کھلے ہیں، جبکہ اسٹیبلشمنٹ کے ساتھ پی ٹی آئی کے روابط بھی برقرار ہیں۔
