دبئی (نیامحاذ)چیمپئنز ٹرافی میں آج گروپ مرحلے کا آخری اور فیصلہ کن میچ بھارت اور نیوزی لینڈ کے درمیان دبئی انٹرنیشنل اسٹیڈیم میں کھیلا جائے گا۔ اس مقابلے کے بعد سیمی فائنل میں ٹیموں کے درمیان ہونے والے میچز کا تعین ہوگا۔
جنوبی افریقہ، نیوزی لینڈ، بھارت اور آسٹریلیا پہلے ہی سیمی فائنل میں پہنچ چکی ہیں۔ پہلا سیمی فائنل 4 مارچ کو منگل کے روز جبکہ دوسرا 5 مارچ بروز بدھ کھیلا جائے گا۔ چیمپئنز ٹرافی کا فائنل 9 مارچ بروز اتوار منعقد ہوگا۔
بھارتی میڈیا رپورٹس کے مطابق آج کے میچ میں بھارت کی پلیئنگ الیون میں چند تبدیلیاں متوقع ہیں۔ این ڈی ٹی وی کے مطابق، اکشر پٹیل یا رویندرا جڈیجہ کی جگہ آل راؤنڈر واشنگٹن سُندر کو موقع دیا جا سکتا ہے۔ اس کے علاوہ محمد سراج کو آرام دینے کی صورت میں نوجوان بولر ارشدیپ سنگھ ٹیم میں شامل ہو سکتے ہیں۔
ممکنہ طور پر بھارت کی ٹیم میں روہت شرما کپتان ہوں گے جبکہ ان کے ساتھ شبھمن گل، ویرات کوہلی، شریاس ائیر، کے ایل راہول، ہاردک پانڈیا، اکشر پٹیل یا واشنگٹن سُندر، رویندرا جڈیجہ، ہرشت رانا، ارشدیپ سنگھ اور ورون چکرورتی شامل ہوں گے۔
