بھارت، کرکٹر دوران میچ دل کا دورہ پڑنے سے زندگی کی بازی ہار گیا

35 سالہ کرکٹر عمران پٹیل کے سوگواران میں بیوی اور 3 بیٹیاں ہیں، سب سے چھوٹی بیٹی کی عمر محض 4 ماہ ہے
پونے (نیوز ڈیسک) بھارت میں مقامی ٹیموں کے مابین میچ میں 35 سالہ کرکٹر دل کا دورہ پڑنے سے زندگی کی بازی ہار گیا۔
جمعرات کو بھارتی شہر پونے کے گروارے اسٹیڈیم میں میچ کے دوران 35 سالہ کرکٹر عمران پٹیل دل کا دورہ پڑنے سے جاں بحق ہوگئے۔ کھلاڑی اوپنر کے طور پر بیٹنگ کرنے آیا اور پچ پر کچھ وقت گزارنے کے بعد سینے اور بازو میں درد کی شکایت کرنے لگا۔

انہوں نے آن فیلڈ امپائرز کو معاملے سے آگاہ کیا اور انہیں میدان چھوڑنے کی اجازت دے دی گئی تاہم پویلین واپس جاتے ہوئے عمران گرگئے۔
میچ کی لائیو اسٹریمنگ کے دوران یہ سارا واقعہ کیمرے میں قید ہوگیا، عمران کے گرتے ہی میدان میں موجود دیگر کھلاڑی ان کی طرف آئے اور انہیں فوری طور پر ہسپتال منتقل کیا گیا جہاں ڈاکٹرز نے اسے مردہ قرار دیا۔
حیران کن بات یہ ہے کہ عمران کی صحت بہت اچھی تھی اور وہ جسمانی طور پر تندرست تھے۔
عمران پٹیل کے سوگواران مں بیوی اور 3 بیٹیاں ہیں جبکہ سب سے چھوٹی بیٹی کی عمر محض 4 ماہ ہے۔
خیال رہے کہ رواں سال ستمبر میں حبیب شیخ نامی کرکٹر بھی میچ کے دوران زندگی کی بازی ہار گیا تھا تاہم وہ ذیابیطس کا مریض تھا۔