اسلام آباد(نیا محاذ)سپریم کورٹ نے زمین تنازع کیس میں متعلقہ فورم سے رجوع کرنے کی ہدایت جاری کرنے کی استدعا مسترد کردی، چیف جسٹس یحییٰ آفریدی نے ریمارکس دیتے ہوئے کہاکہ کبھی کبھی سپریم کورٹ کے ایک جملہ لکھنے سے 18،18سال کیسز چلتے رہتے ہیں،حکم میں ایسا کچھ نہیں لکھیں گے جس سے دوبارہ سول کورٹ میں کیس شروع ہو جائے۔نجی ٹی وی چینل جیو نیوز کے مطابق سپریم کورٹ میں زمین تنازع کیس کی سماعت ہوئی،چیف جسٹس یحییٰ آفریدی کی سربراہی میں دو رکنی بنچ نے سماعت کی ،وکیل درخواستگزار نے کہاکہ سپریم کورٹ تحریری حکم میں ہمیں متعلقہ فورم سے رجوع کی ہدایت کردے،چیف جسٹس یحییٰ آفریدی نے کہاکہ میں رجسٹرار آفس کے اعتراضات کیخلاف ایک اپیل سن رہا تھا، وکیل نے استدعا کی کہ سپریم کورٹ متعلقہ فورم سے رجوع کرنے کی ہدایت جاری کرے، کبھی کبھی سپریم کورٹ کے ایک جملہ لکھنے سے 18،18سال کیسز چلتے رہتے ہیں،حکم میں ایسا کچھ نہیں لکھیں گے جس سے دوبارہ سول کورٹ میں کیس شروع ہو جائے،جسٹس شاہد بلال نے کہاکہ سپریم کورٹ کے لکھے بغیر بھی متعلقہ فورم سے رجوع کرسکتے ہیں،سپریم کورٹ نے متعلقہ فورم سے رجوع کرنے کی ہدایت جاری کرنے کی استدعا مسترد کردی۔
0
