سیاست سے کنارہ کشی نہیں کی، شیخ رشید

غریب آدمی کو اڈیالہ جانے کے لیے 2 ہزار روپے چاہیے ہوتے ہیں، اس عید پر بے گناہ لوگوں کو رہائی ملنی چاہیے،میڈیا سے گفتگو

اسلام آباد (نیا محاز اخبارتازہ ترین – این این آئی۔ 10 جون2024ء) سابق وزیر شیخ رشید احمد نے کہاہے کہ سیاست سے کنارہ کشی نہیں کی، غریب آدمی کو اڈیالہ جانے کے لیے 2 ہزار روپے چاہیے ہوتے ہیں، اس عید پر بے گناہ لوگوں کو رہائی ملنی چاہیے۔عدالت کے باہر شیخ رشید احمد نے میڈیا سے گفتگو کرتے ہوئے کہا کہ ہمارا فائنل میچ بھارت کے ساتھ تھا، ہم ہار گئے، پاکستان کے جذبات مجروح ہوتے ہیں، ہر صبح ملک میں ایک بری خبر آتی ہے، یہ بھی ایک بری خبر ہے۔
انہوںنے کہاکہ 500 آدمیوں کو جھوٹے کیسز میں اڈیالہ میں رکھا ہوا ہے، غریب آدمی کو اڈیالہ جانے کے لیے 2 ہزار روپے چاہیے ہوتے ہیں، اس عید پر بے گناہ لوگوں کو رہائی ملنی چاہیے، حکومت کو نوٹس لینا چاہیے، جب تک بے گناہ لوگ جیلوں سے نہیں نکلالے جائیں گے عزت کے خواہشمند افراد کو عزت نہیں ملے گی۔

انہوں نے بتایا کہ نواز شریف اب میری طرح سائیڈ پر ہی رہیں وہ دن گئے جب خلیل جبران فاختہ اڑایا کرتے تھے، 2 مہینے سیاسی طور پر اہم ہیں، فیصلے کرنے ہوں گے، میں نے سیاست سے کنارہ نہیں کیا، 2 مہینے تک سائیڈ پر ہوں ، حکومت کو نہ یو اے ای، نہ سعودی عرب اور نہ چین سے پیسے ملے، ان بھکاریوں کو کوئی خیرات بھی نہیں دے رہا، 2 ماہ میں چور لٹیروں کی سیاست کا فیصلہ ہوگا، اس بار عید کے بعد قربانی ہوگی، کھال سمیت ہوگی قصائی کا انتظام ہے۔