لاہور( نیا محاز )وزیر اعلیٰ پنجاب مریم نواز شریف نے صوبے میں 450کلو میٹر طویل تین نئے روڈ کوریڈور تعمیر کرنے کی منظوری دے دی۔
تینوں کوریڈور ایشین ڈویلپمنٹ بینک اور حکومت پنجاب کے اشتراک کار سے مکمل کئے جائیں گے، 210ارب روپے کی لاگت سے تینوں پراجیکٹ دسمبر2025ءتک مکمل ہوں گے۔وزیر اعلیٰ نے خصوصی اجلاس میں تین ماہ میں نئے روڈ کوریڈور پر تعمیرات آغاز کرنے کا حکم دیا ہے۔ساہیوال سے چیچہ وطنی اور رجانہ سے لیہ تک دو رویہ سڑک بنائی جائے گی، دیپالپور سے وہاڑی تک سنگل روڈ کو دو رویہ سڑک میں بدل دیا جائے گااور شور کوٹ جھنگ چراغ والی تک نئی دو رویہ سڑک بنائی جائے گی۔
مریم نواز نے کہا کہ بڑے شہروں کو منسلک کرنے والے روڈ کوریڈورز سے عوام کو آمد و رفت میں آسانی ہوگی،پراجیکٹ نہ صرف سفری مشکلات کو کم کرے گا بلکہ معاشی ترقی میں بھی اہم کردار ادا کرے گا۔
خصوصی اجلاس میں سینیٹر پرویز رشید، صوبائی وزیر تعمیرات و مواصلات صہیب احمد ملک، چیف سیکرٹری، چیئرمین پی اینڈ ڈی، سیکرٹری تعمیرات و مواصلات اور دیگر متعلقہ حکام نے شرکت کی۔
