پاکستان اسٹاک مارکیٹ میں شدید مندی، ہنڈرڈ انڈیکس میں 1500 پوائنٹس سے زائد کی کمی

کراچی: (نیا محاذ) پاکستان اسٹاک ایکسچینج میں کاروباری ہفتے کے تیسرے روز کا آغاز شدید مندی کے رجحان کے ساتھ ہوا، جس سے سرمایہ کاروں کو بڑا دھچکا پہنچا۔
تفصیلات کے مطابق، بدھ کے روز کاروبار کے آغاز پر ہنڈرڈ انڈیکس میں 1500 سے زائد پوائنٹس کی نمایاں کمی ریکارڈ کی گئی، جس کے بعد انڈیکس 1,13,040 پوائنٹس کی سطح پر آ گیا۔ یہ صورتحال سرمایہ کاروں کے اعتماد میں کمی اور مارکیٹ کے غیر مستحکم ماحول کی عکاسی کرتی ہے۔
یاد رہے کہ گزشتہ کاروباری دن اسٹاک مارکیٹ میں 808 پوائنٹس کا اضافہ ریکارڈ کیا گیا تھا، جس کے بعد انڈیکس 1,14,872 پوائنٹس پر بند ہوا تھا۔ تاہم آج کی مندی نے اس بہتری کو مکمل طور پر زائل کر دیا ہے۔
ماہرین کا کہنا ہے کہ موجودہ صورتحال سیاسی غیر یقینی، عالمی مالیاتی دباؤ اور معاشی پالیسیاں اس مندی کی بڑی وجوہات ہو سکتی ہیں۔ سرمایہ کار فی الحال محتاط رویہ اختیار کیے ہوئے ہیں، جب کہ مارکیٹ میں مزید اتار چڑھاؤ کا امکان ظاہر کیا جا رہا ہے۔