نیا محاذ: اسلام آباد — وزیر اعظم محمد شہباز شریف نے کہا ہے کہ پاکستان کے باصلاحیت نوجوان کرپٹوکرنسی کے فروغ میں اہم کردار ادا کر سکتے ہیں۔
وزیر اعظم آفس کے ذرائع کے مطابق، وزیر اعظم شہباز شریف سے عالمی فائنانس کمپنی ورلڈ لبرٹی فنانشل کے شریک چیئرمین زیک ویٹکوف کی سربراہی میں وفد نے ملاقات کی۔
وزیر اعظم نے اس ملاقات کے دوران کہا کہ پاکستان میں مختلف شعبوں میں سرمایہ کاری کے پرکشش مواقع موجود ہیں، اور پاکستان دنیا کے ان چند ممالک میں شامل ہے جہاں کرپٹوکرنسی کو تیزی سے اپنایا جا رہا ہے۔
شہباز شریف نے مزید کہا کہ پاکستان کے نوجوان کرپٹوکرنسی جیسے نئے معاشی طریقوں کی ترویج میں اہم کردار ادا کر سکتے ہیں، اور ملک میں اس شعبے کے ترقی کے لیے قوائد و ضوابط کی تشکیل پر کام تیزی سے جاری ہے۔
زیک ویٹکوف نے ملاقات میں پاکستان کے قدرتی وسائل اور سرمایہ کاری کے حوالے سے عالمی سرمایہ کاروں کے لیے پرکشش مواقع پر بات کرتے ہوئے کہا کہ پاکستان نہ صرف اس خطے بلکہ پوری دنیا میں سرکردہ معیشتوں میں شامل ہونے کی صلاحیت رکھتا ہے۔
ملاقات میں نائب وزیر اعظم و وزیرخارجہ سینیٹر اسحاق ڈار، آرمی چیف جنرل سید عاصم منیر، وزیر دفاع خواجہ محمد آصف، وزیر اطلاعات و نشریات عطا اللہ تارڑ، وفاقی وزیر برائے اقتصادی امور احد خان چیمہ اور دیگر اعلیٰ افسران بھی موجود تھے۔
0
