پاکستان میں شدید گرمی کی لہر، محکمہ موسمیات نے ہیٹ ویو الرٹ جاری کر دیا

لاہور (نیا محاذ) – ملک بھر میں آج موسم گرم اور خشک رہنے کی توقع ہے، جبکہ محکمہ موسمیات نے خبردار کیا ہے کہ آج سے 30 اپریل تک شدید گرمی کی لہر جاری رہے گی۔ اس حوالے سے ہیٹ ویو الرٹ بھی جاری کر دیا گیا ہے۔
محکمہ موسمیات کے مطابق، آج بالائی فضا میں ہوا کے دباؤ کے داخل ہونے کا امکان ہے، جو کل سے ملک کے بیشتر علاقوں کو متاثر کرے گا۔ جنوبی پنجاب، سندھ اور بلوچستان میں درجہ حرارت معمول سے 5 سے 7 ڈگری سینٹی گریڈ زیادہ رہنے کی پیشگوئی کی گئی ہے۔
اسلام آباد، وسطی و بالائی پنجاب، خیبرپختونخوا، کشمیر اور گلگت بلتستان میں بھی درجہ حرارت 4 سے 6 ڈگری سینٹی گریڈ تک بڑھنے کی توقع ہے۔ محکمہ موسمیات کا کہنا ہے کہ 30 اپریل سے بارش برسانے والی ہوائیں ملک کے بالائی علاقوں میں داخل ہوں گی، جس کے نتیجے میں کشمیر، اسلام آباد، شمال مشرقی پنجاب، بالائی خیبرپختونخوا اور گلگت بلتستان میں بارش اور چند مقامات پر ژالہ باری کا امکان ہے۔
ہیٹ ویو کی شدت میں یکم مئی کے بعد کمی آنے کی توقع کی جا رہی ہے۔
پنجاب میں گرمیوں کی چھٹیوں کا اعلان
دوسری جانب، بڑھتی ہوئی گرمی کے پیش نظر صوبہ پنجاب کے تعلیمی اداروں میں موسم گرما کی تعطیلات کا اعلان کر دیا گیا ہے۔ سیکرٹری اسکول ایجوکیشن پنجاب، خالد نذیر وٹو کے مطابق یکم جون سے سکولوں میں گرمیوں کی چھٹیاں شروع ہوں گی، تاہم اگر درجہ حرارت میں غیر معمولی اضافہ ہوا تو تعطیلات ایک ہفتہ قبل بھی دی جا سکتی ہیں۔
ماہرین کے مطابق عالمی سطح پر موسمیاتی تبدیلیوں نے دنیا کے کئی ممالک کو متاثر کیا ہے، اور پاکستان ان چند ممالک میں شامل ہے جو گلوبل وارمنگ کے باعث شدید خطرات سے دوچار ہیں۔ ان تبدیلیوں کے نتیجے میں قدرتی آفات، جیسے زلزلے اور سیلابوں کی تعداد میں بھی اضافہ ہو رہا ہے۔