لاہور (نیا محاذ) – فلسطینی عوام سے اظہار یکجہتی کے لیے جماعت اسلامی کی اپیل پر ملک بھر میں شٹر ڈاؤن ہڑتال جاری ہے، مختلف شہروں میں تجارتی مراکز مکمل طور پر بند ہیں۔
لاہور میں بادامی باغ آٹو پارٹس مارکیٹ سمیت تمام بڑی کار ڈیلرز مارکیٹیں بند ہیں۔ اردو بازار، مال روڈ، انارکلی، شاہ عالم مارکیٹ، برانڈرتھ روڈ، ہال روڈ اور ملحقہ تجارتی علاقوں میں بھی کاروباری سرگرمیاں معطل ہیں۔ ریڈی میڈ گارمنٹس مارکیٹ، سولر مارکیٹ اور شہر کی مرکزی غلہ منڈی بھی مکمل بند ہے۔
پشاور میں قصہ خوانی، خیبر بازار، پیپل منڈی، صدر اور ہشت نگری سمیت اہم تجارتی مراکز میں دکانیں بند ہیں۔ تنظیم تاجران کے مطابق رامپورہ گیٹ پر احتجاجی کیمپ بھی لگایا جائے گا۔
امیر جماعت اسلامی پاکستان حافظ نعیم الرحمان نے کہا ہے کہ یہ ملک گیر شٹر ڈاؤن ہڑتال اہل غزہ سے اظہار یکجہتی کے لیے ہے، پاکستانی قوم فلسطینی عوام کی نسل کشی کسی صورت برداشت نہیں کر سکتی۔
کراچی میں تاجر اتحاد کی ہڑتال سے لاتعلقی
دوسری جانب کراچی میں آل سٹی تاجر اتحاد نے جماعت اسلامی کی کال پر ہونے والی ہڑتال سے لاتعلقی کا اعلان کر دیا ہے۔ تاجر اتحاد کے رہنما شرجیل گوپلانی نے واضح کیا کہ کراچی ٹمبر مارکیٹ سمیت دیگر کاروباری مراکز آج مکمل طور پر کھلے رہیں گے۔ انہوں نے مزید کہا کہ تاجر برادری 7 اپریل کو اپنا احتجاج پہلے ہی ریکارڈ کروا چکی ہے۔
تاجروں کی جماعت اسلامی کے خلاف پولیس کو شکایت
کراچی کے بعض تاجروں کی جانب سے جماعت اسلامی کے خلاف آئی جی سندھ کو شکایت بھی کی گئی ہے۔ جامع الائنس مارکیٹ ایسوسی ایشن کے چیئرمین شیخ محمد ارشاد نے اپنے خط میں الزام عائد کیا کہ جماعت اسلامی کی جانب سے ہڑتال کے حوالے سے دھمکی آمیز پیغامات موصول ہو رہے ہیں اور پولیس سے تحفظ فراہم کرنے کی اپیل کی گئی ہے۔
0
