نارووال(نیا محازاخبارتازہ ترین۔18 اپریل2024 ء) وزیراعلیٰ پنجاب مریم نواز کے پروٹوکول سکیورٹی سکواڈ کی گاڑی کی مبینہ ٹکر سے نوجوان جاں بحق ہوگیا،نوجوان کی لاش ڈی ایچ کیو ہسپتال منتقل کر دی گئی ہے۔تفصیلات کے مطابق ڈسٹرکٹ پولیس آفیسر (ڈی پی او) نارووال کا کہنا ہے کہ نوجوان آج صبح نارووال کے علاقے چندووال میں وزیراعلیٰ کی سکیورٹی سکواڈ کی گاڑی کی مبینہ ٹکر سے جاں بحق ہوا۔
وزیراعلیٰ کی سکیورٹی کیلئے گاڑیاں کرتارپور جارہی تھیں جب مبینہ طور پر ایلیٹ فورس کی گاڑی اوور ٹیک کرتے ہوئے موٹر سائیکل سے ٹکرائی جس سے نوجوان ابوبکر موقع پر ہی جاں بحق ہوگیا۔ موٹر سائیکل سوار نوجوان کی موت موٹر سائیکل سے ٹکر سے ہوئی ہے جبکہ دوسرے موٹر سائیکل سوار کی تلاش جاری ہے۔
پولیس واقعے کی تحقیقات کر رہی ہے۔ڈی پی او کا مزید کہنا تھا کہ نوجوان کے لواحقین کی درخواست پر ایف آئی آر درج کر رہے ہیں اور تحقیقات کے بعد ذمہ داروں کے خلاف بلا امتیاز قانونی کارروائی کی جائے گی۔
وزیراعلیٰ پنجاب مریم نواز نے آج کرتار پورکا دورہ کرنا تھا اور بیساکھی میلے کی تقریب میں شرکت کرنا تھی۔وزیراعلیٰ پنجاب مریم نواز کے دورہ کرتاپور سے قبل ریجنل پولیس آفیسرطیب حفیظ اور کمشنر گوجرانوالہ نوید حیدرشیرازی نے نے گوردوارہ کا دورہ کیا اور سیکورٹی انتظامات کا جائزہ لیا ۔گوروارہ کے منتظمین اور سکھ یاتریوں سے ملاقات بھی کی۔
ان کا کہنا تھا کہ سکھ برادری کو مکمل تحفظ فراہم کیا جائیگا اور مذہبی رسومات کی ادائیگی کیلئے ہر قسم کی سیکورٹی فراہم کی جائیگی۔منتظمین گوردوارہ نے پولیس کی جانب سے سیکورٹی انتظاما ت پر اطمینان کااظہار کیا اور کہا کہ مقامی پولیس و انتظامی مکمل الرٹ ہو کر ڈیوٹی سرانجام دے رہی ہے ۔ریجنل چیف پولیس آفیسر نے گوردوارہ کے داخلی و خارجی راستوں کا مکمل معائنہ کیا او ر ڈیوٹی پر تعینات افسران و جوانوں کو مکمل بریفنگ دی اور مشکوک افراد پر کڑی نظررکھنے کی ہدایات جاری کیں۔
