دبئی ورلڈ ٹریڈ سینٹر میں “گلف انفارمیشن ٹیکنالوجی ایگزی بیشن” کا انعقاد، سفیر پاکستان نے افتتاح کردیا

دبئی ( نیا محاذ) متحدہ عرب امارات (یو اے ای) میں پاکستان کے سفیر فیصل نیاز ترمذی نے آج دبئی ورلڈ ٹریڈ سینٹر میں”گلف انفارمیشن ٹیکنالوجی ایگزی بیشن”( GITEX )گلوبل 2024 میں پاکستان پویلین کا افتتاح کیا۔ سفیر پاکستان فیصل نیاز ترمذی نے اس نمائش میں پاکستان کو “2024 کی تکنیکی منزل” کے طور پر تسلیم کرنے پر اپنے فخر کا اظہار کیا، جو کہ آئی ٹی سے متعلق خدمات اور مصنوعات میں ملک کی شاندار پیش رفت کا اعتراف ہے۔
اس موقع پر قونصلیٹ جنرل آف پاکستان دبئی کے قونصل جنرل حسین محمد، تجارت و سرمایہ کاری کے قونصلر علی زیب خان اور پاکستان کے اعلیٰ سرکاری افسران بھی موجود تھے۔ فیصل نیاز ترمذی نے متحدہ عرب امارات کو پاکستان کی آئی ٹی برآمدات کی خاطر خواہ نمو پر روشنی ڈالی جو کہ 34 فیصد اضافے کے ساتھ 265 ملین ڈالر تک پہنچ گئی ہے۔ انہوں نے یہ بھی نوٹ کیا کہ پاکستان کی عالمی آئی ٹی برآمدات اب 3.2 بلین ڈالر سے تجاوز کر گئی ہیں، جس میں مسلسل ترقی کے امکانات ہیں۔
فیصل نیاز ترمذی نے وزارت انفارمیشن ٹیکنالوجی اینڈ ٹیلی کمیونیکیشن (MoITT)، پاکستان سافٹ ویئر ایکسپورٹ بورڈ (PSEB)، پاکستان سافٹ ویئر ہاؤسز ایسوسی ایشن (PASHA) اور خصوصی سرمایہ کاری سہولت کونسل (SIFC) کی پاکستان کی آئی ٹی صنعت کو منظم کرنے اور اس کی نمائش کے لیے مشترکہ کوششوں کا اعتراف کیا۔ نمائش میں ان کی مشترکہ کوششوں نے پاکستان کے لیے دنیا کی سب سے بڑی آئی ٹی نمائش GITEX Global میں اپنی صلاحیتوں کا مکمل سپیکٹرم پیش کرنا ممکن بنایا ہے-
سفیر فیصل نیاز ترمذی نے کہا کہ محمد شہباز شریف اور وزیر مملکت برائے آئی ٹی اینڈ ٹیلی کمیونیکیشن شزہ فاطمہ خواجہ، پاکستان کے آئی ٹی سیکٹر کو آگے بڑھانے اور ان کے وژن کے لیے کوشاں ہیں۔
سفیرپاکستان نے کاروباری رہنماؤں اور آئی ٹی پروفیشنلز کو پاکستان پویلین کا دورہ کرنے کی ترغیب دی، جہاں 24 نمائش کنندگان جدید ٹیکنالوجی اور خدمات کی نمائش کر رہے ہیں۔ انہوں نے اس بات پر زور دیا کہ GITEX گلوبل پاکستانی آئی ٹی ماہرین کو اپنے عالمی ہم منصبوں سے رابطہ قائم کرنے اور ممکنہ تعاون تلاش کرنے کا ایک بے مثال موقع فراہم کرتا ہے۔