بہاولنگر (نیا محاذ) چشتیاں سے ایک دل دہلا دینے والی خبر سامنے آئی ہے جہاں واٹر سپلائی کنکشن کے تنازع پر ہونے والی فائرنگ سے ایک ہی خاندان کے تین افراد جان کی بازی ہار گئے۔
تفصیلات کے مطابق یہ افسوسناک واقعہ تھانہ صدر چشتیاں کی حدود میں واقع چک نمبر 33 فتح میں پیش آیا جہاں دو گروپوں کے درمیان پانی کے کنکشن کے معاملے پر شدید تلخ کلامی کے بعد فائرنگ کا تبادلہ ہوا۔ فائرنگ کی زد میں آ کر ایک باپ اور اس کے دو بیٹے موقع پر ہی جاں بحق ہو گئے جبکہ ایک شخص شدید زخمی ہوا۔
زخمی کو فوری طور پر تشویشناک حالت میں ہسپتال منتقل کر دیا گیا ہے۔ جاں بحق افراد کی لاشوں کو تحصیل ہیڈکوارٹر ہسپتال چشتیاں منتقل کر کے پوسٹ مارٹم کے لیے بھیج دیا گیا ہے۔
واقعے کی اطلاع ملتے ہی پولیس کی بھاری نفری موقع پر پہنچ گئی اور علاقے کو گھیرے میں لے کر شواہد اکٹھے کرنے کا عمل شروع کر دیا۔ پولیس حکام کے مطابق واقعے میں ملوث ملزمان کی تلاش جاری ہے اور ان کے خلاف قانونی کارروائی کا آغاز کر دیا گیا ہے۔
پولیس کا کہنا ہے کہ علاقے میں امن و امان کی صورتحال کو قابو میں رکھنے کے لیے اقدامات کیے جا رہے ہیں اور جلد ملزمان کو گرفتار کر کے انصاف کے کٹہرے میں لایا جائے گا۔
یہ واقعہ نہ صرف ایک خاندانی المیہ ہے بلکہ معاشرتی برداشت کی کمی اور تنازعات کو پرامن طریقے سے حل نہ کرنے کے رویے کی عکاسی کرتا ہے۔
0
