بورے والا (نیا محاذ) بورے والا کے نواحی گاؤں 243 ای بی میں افسوسناک واقعہ پیش آیا جہاں رشتے کے تنازع پر ایک نوجوان نے فائرنگ کر کے لڑکی کو موت کے گھاٹ اتار دیا۔
پولیس ذرائع کے مطابق ملزم سانول چوہان مقتولہ سے شادی کا خواہش مند تھا، تاہم لڑکی کے والدین نے اس کی منگنی کسی اور جگہ طے کر دی تھی۔ اس بات پر مشتعل ہو کر ملزم نے طیش میں آ کر فائرنگ کر دی جس کے نتیجے میں لڑکی موقع پر ہی جاں بحق ہو گئی۔
فائرنگ کے بعد ملزم جائے واردات سے فرار ہو گیا، جبکہ مقتولہ کی لاش کو پوسٹ مارٹم کے لیے مقامی ہسپتال منتقل کر دیا گیا ہے۔ پولیس نے موقع پر پہنچ کر ابتدائی شواہد اکٹھے کر لیے ہیں اور ملزم کی گرفتاری کے لیے چھاپے مارے جا رہے ہیں۔
اہل علاقہ کا کہنا ہے کہ یہ واقعہ علاقائی رسم و رواج اور زبردستی شادیوں کے بڑھتے ہوئے مسائل کی عکاسی کرتا ہے، اور ایسے واقعات کی روک تھام کے لیے موثر قانون سازی اور شعور بیدار کرنے کی ضرورت ہے۔
0
