اسلام آباد (نیا محاذ)
پاکستان نے ڈیجیٹل معیشت کی جانب تاریخی پیش رفت کرتے ہوئے بٹ کوائن مائننگ اور مصنوعی ذہانت (AI) ڈیٹا سینٹرز کیلئے 2000 میگاواٹ بجلی مختص کرنے کا فیصلہ کر لیا ہے، جو قومی ڈیجیٹل انفراسٹرکچر منصوبے کے پہلے مرحلے کا حصہ ہے۔
وزارت خزانہ کے حکام کے مطابق، اس منصوبے کا مقصد ملکی معیشت کو جدید ٹیکنالوجی کی بنیادوں پر استوار کرنا ہے۔ اضافی بجلی کے استعمال سے جہاں بلاک چین اور اے آئی جیسے جدید شعبوں کو فروغ ملے گا، وہیں پاکستان کا ٹیکنالوجی سیکٹر بھی نئی بلندیوں کو چھوئے گا۔
اس منصوبے کی نگرانی پاکستان کرپٹو کونسل کرے گی، جو اس بات کو یقینی بنائے گی کہ بجلی کے وسائل کا مؤثر اور شفاف استعمال ہو۔ حکام نے امید ظاہر کی ہے کہ اس اقدام سے نہ صرف غیر ملکی سرمایہ کاری بڑھے گی بلکہ ہزاروں نوجوانوں کو روزگار بھی ملے گا۔
معاشی تجزیہ کاروں کا کہنا ہے کہ پاکستان کی جانب سے بٹ کوائن مائننگ، ڈیجیٹل ڈیٹا پروسیسنگ اور AI کے شعبے میں سرمایہ کاری ایک انقلابی قدم ہے، جو ملک کو ڈیجیٹل خودمختاری، معاشی وسعت اور قومی سلامتی کے میدان میں نئی جہتیں عطا کرے گا۔
حکومت کا مؤقف ہے کہ پاکستان ٹیکنالوجی کی عالمی دوڑ میں اب پیچھے نہیں رہے گا بلکہ مستقبل کی ڈیجیٹل دنیا میں اپنا مضبوط اور خودمختار مقام بنانے کی راہ پر گامزن ہو چکا ہے۔
رپورٹ: نیا محاذ
0
