گوگل پلے اسٹور کی خطرناک ایپس سے ڈیٹا چوری کا انکشاف، صارفین کیلئے الرٹ جاری

اسلام آباد – (نیا محاذ) گوگل پلے اسٹور پر موجود خطرناک موبائل ایپس کے ذریعے صارفین کا ذاتی ڈیٹا اور مالی معلومات چوری کیے جانے کا انکشاف ہوا ہے۔ حکومت کے زیرِ انتظام ادارے این ٹی آئی ایس بی نے اس حوالے سے سائبر سیکیورٹی ایڈوائزری جاری کر دی ہے۔
ایڈوائزری کے مطابق یہ ایپس اسپائی ویئر اور اناتسا (ٹی باٹ) بینکنگ ٹروجن کے ذریعے صارفین کی نجی معلومات، پاسورڈز، کال لاگز، لوکیشن، آڈیو، ویڈیوز اور اسکرین شاٹس تک رسائی حاصل کرتی ہیں۔ ان حملوں کے پیچھے شمالی کوریا کے ہیکرز گروپس APT-37 اور APT-43 کا ہاتھ بتایا جا رہا ہے۔
اہم انکشافات:
خطرناک ایپس فائل منیجرز یا سیکیورٹی ٹولز کے نام سے موجود تھیں۔
گوگل نے مارچ میں درجنوں مشتبہ ایپس کو پلے اسٹور سے ہٹا دیا تھا۔
یہ ایپس اب تک 2 لاکھ 20 ہزار سے زائد بار ڈاؤن لوڈ کی جا چکی ہیں۔
ایڈوائزری میں عوام، سرکاری وزارتوں اور اداروں کو خبردار کیا گیا ہے کہ وہ مشتبہ ایپس سے بچیں، صرف قابلِ اعتماد ڈویلپرز کی ایپس استعمال کریں، اور ایپس انسٹال کرتے وقت ان کی اجازتیں اور تفصیلات لازمی چیک کریں۔
مزید یہ کہ گوگل پلے پروٹیکٹ کو ہمیشہ فعال رکھا جائے تاکہ نقصان دہ ایپس کی بروقت شناخت ہو سکے۔ سائبر حملوں سے نہ صرف نجی معلومات کا ضیاع ہوتا ہے بلکہ مالی نقصان کا بھی شدید خطرہ رہتا ہے۔
تمام متعلقہ اداروں کو ایڈوائزری پر عملدرآمد یقینی بنانے کی ہدایت کی گئی ہے تاکہ ڈیجیٹل سیکیورٹی کو مضبوط بنایا جا سکے۔