پشاور: (نیا محاذ) پشاور کے علاقے ارمڑ میں خٹکو پل کے قریب خاندانی دشمنی ایک ہولناک خونی تصادم میں تبدیل ہو گئی، جس کے نتیجے میں ایک ہی خاندان کے چھ افراد بے دردی سے قتل کر دیئے گئے۔ جاں بحق افراد میں تین خواتین بھی شامل ہیں۔
پولیس کے مطابق واقعے میں ہلاک ہونے والوں کی شناخت فضل امین، حضرت امین اور احمد کے ناموں سے ہوئی ہے۔ فائرنگ کے اس اندوہناک واقعے کے بعد علاقے میں خوف و ہراس پھیل گیا۔
واقعہ کی اطلاع ملتے ہی پولیس اور امدادی ٹیمیں فوری طور پر جائے وقوعہ پر پہنچ گئیں، جہاں نعشوں کو ضروری کارروائی کے بعد اسپتال منتقل کیا گیا جبکہ ایک زخمی خاتون کو شدید زخمی حالت میں لیڈی ریڈنگ اسپتال منتقل کر دیا گیا ہے۔
ابتدائی تحقیقات کے مطابق واقعہ خاندانی دشمنی کا نتیجہ معلوم ہوتا ہے، تاہم پولیس کا کہنا ہے کہ واقعے کی مکمل تحقیقات جاری ہیں اور تمام پہلوؤں کا بغور جائزہ لیا جا رہا ہے۔
پولیس حکام نے بتایا کہ شواہد اکٹھے کر کے کارروائی شروع کر دی گئی ہے جبکہ ملزمان کی گرفتاری کیلئے خصوصی ٹیمیں تشکیل دی جا چکی ہیں۔ حکام کو جلد پیش رفت کی امید ہے۔
0
