جنگ بندی خطرے میں، بھارت کا رویہ منفی ہے: بلاول بھٹو زرداری

لاہور: چیئرمین پاکستان پیپلز پارٹی بلاول بھٹو زرداری نے خبردار کیا ہے کہ بھارت کے منفی اور جارحانہ رویے کے باعث پاکستان اور بھارت کے درمیان حالیہ جنگ بندی کو خطرات لاحق ہو چکے ہیں۔
ایک نجی ٹی وی چینل سے گفتگو کرتے ہوئے بلاول بھٹو نے کہا کہ حالیہ کشیدہ صورتحال میں پاکستان نے نہ صرف عسکری سطح پر بلکہ سفارتی محاذ پر بھی نمایاں کامیابیاں حاصل کیں۔ دنیا کو واضح پیغام دیا گیا کہ پاکستان جنگ کا خواہاں نہیں، مگر اپنے دفاع کی مکمل صلاحیت رکھتا ہے۔
انہوں نے کہا کہ مسئلہ کشمیر کو مذاکرات کا حصہ بنانا پاکستان کی ایک بڑی سفارتی جیت ہے، کیونکہ بھارت ہمیشہ اسے اپنا اندرونی معاملہ قرار دیتا آیا ہے۔ پاکستان کی خواہش ہے کہ سیز فائر کو دیرپا امن کی بنیاد بنایا جائے اور تمام تنازعات، بشمول کشمیر، بات چیت سے حل کیے جائیں۔
بلاول بھٹو نے کہا کہ پہلگام واقعے پر پاکستان نے غیرجانبدار تحقیقات کی پیشکش کی ہے جبکہ بھارت پر دریا سندھ کے پانی کو بطور ہتھیار استعمال کرنے اور دہشتگردی میں ملوث ہونے جیسے سنگین الزامات موجود ہیں۔
چیئرمین پیپلز پارٹی نے چین، ترکیہ اور سعودی عرب کے مثبت کردار کو سراہتے ہوئے کہا کہ بھارت کی مذاکرات پر آمادگی دراصل پاکستان کی ایک بڑی سفارتی کامیابی ہے۔