نیا محاذ:بیجنگ: امریکا اور چین کے درمیان تجارتی معاہدے پر اتفاق کے بعد دنیا کے دس بڑے ارب پتی افراد کی دولت میں صرف ایک رات کے دوران حیران کن طور پر 84 ارب ڈالر کا اضافہ ہوا ہے۔
اس فہرست میں سب سے زیادہ فائدہ سابق فیس بک (موجودہ میٹا) کے شریک بانی مارک زکربرگ کو ہوا، جن کی دولت میں 16.1 ارب ڈالر کا اضافہ ریکارڈ کیا گیا۔ ان کے بعد ایمیزون کے بانی جیف بیزوس ہیں جن کی دولت میں 14.3 ارب ڈالر کا اضافہ ہوا۔
ٹیسلا اور ایکس کے بانی ایلون مسک، جو دنیا کے امیر ترین شخص بھی ہیں، ان کی دولت میں 14.5 ارب ڈالر کا اضافہ ہوا۔ ماہرین کے مطابق اسٹاک مارکیٹ میں معمولی اتار چڑھاؤ بھی ان کی دولت پر گہرے اثرات ڈالتا ہے۔
العربیہ بزنس کی رپورٹ کے مطابق اس رات امیر ہونے والے افراد کی اکثریت کا تعلق ٹیکنالوجی کے شعبے سے تھا۔ تاہم، اس فہرست میں شامل تین ارب پتی افراد ٹیکنالوجی کے علاوہ دیگر صنعتوں سے وابستہ تھے۔ ان میں فرانس کے مشہور بزنس مین اور یورپ کے سب سے دولت مند شخص برنارڈ آرنو شامل ہیں، جن کی دولت میں 7.1 ارب ڈالر کا اضافہ دیکھا گیا۔
بھارت کے معروف ارب پتی مکیش امبانی اور گوتم اڈانی نے بھی پاک بھارت کے درمیان حالیہ جنگ بندی کے باعث بالترتیب 4.42 ارب ڈالر اور 5.31 ارب ڈالر اپنی دولت میں شامل کیے۔
اس تاریخی معاشی بہتری سے مستفید ہونے والوں میں ڈیل، انویڈیا، اوریکل اور الفابیٹ جیسی بڑی ٹیکنالوجی کمپنیوں سے وابستہ ارب پتی افراد بھی شامل تھے۔
0
