معرکہ حق میں پاک افواج کے 11 جوان شہید، 78 زخمی، بھارت کو مؤثر جواب: آئی ایس پی آر

راولپنڈی: (نیا محاذ) پاک فوج کے شعبہ تعلقات عامہ (آئی ایس پی آر) نے معرکہ حق کے دوران شہید ہونے والے جوانوں اور زخمی اہلکاروں کی تفصیلات جاری کر دی ہیں۔ ترجمان کے مطابق وطن کی حفاظت کرتے ہوئے 11 جوان شہید اور 78 اہلکار زخمی ہوئے۔
شہداء میں پاک آرمی کے 6 اور فضائیہ کے 5 اہلکار شامل ہیں۔
آئی ایس پی آر نے بتایا کہ جام شہادت نوش کرنے والوں میں لانس نائیک عبدالرحمان، دلاور خان، اکرام اللہ اور نائیک وقار خالد شامل ہیں، جبکہ سپاہی عدیل اکبر اور نثار بھی مادر وطن پر قربان ہوئے۔
پاک فضائیہ کے جانباز شہداء میں سکواڈرن لیڈر عثمان یوسف، چیف ٹیکنیشن اورنگزیب، سینئر ٹیکنیشن نجیب سلطان، مبشر اور کارپورل ٹیکنیشن فاروق شامل ہیں۔
ترجمان کے مطابق بھارتی فوج نے 6 اور 7 مئی کو بلااشتعال حملے کیے، جن میں 40 عام شہری شہید ہوئے، ان میں 7 خواتین اور 15 بچے شامل ہیں۔ بھارتی جارحیت کے نتیجے میں 121 شہری زخمی ہوئے جن میں 27 بچے اور 10 خواتین بھی شامل ہیں۔
آئی ایس پی آر نے واضح کیا کہ:
“شہداء قوم کا فخر ہیں، ان کی قربانیاں جرات، قربانی اور محب الوطنی کی روشن علامت ہیں، انہیں کبھی فراموش نہیں کیا جائے گا۔”
ترجمان نے مزید کہا:
“قوم زخمی اہلکاروں کی جلد صحتیابی کے لیے دعاگو ہے، جبکہ پاکستان کی خودمختاری پر کوئی سمجھوتہ نہیں ہوگا۔ اگر دشمن نے دوبارہ جارحیت کی، تو فیصلہ کن جواب دیا جائے گا۔”