اسلام آباد: (نیا محاذ) دفتر خارجہ نے کہا ہے کہ پاکستان امریکی صدر ڈونلڈ ٹرمپ کی جانب سے جموں و کشمیر کے تنازع کے حل کی کوششوں کی حمایت کا خیرمقدم کرتا ہے، اور ان کی قیادت میں امن کی جانب بڑھتے قدموں کو سراہتا ہے۔
ترجمان دفتر خارجہ نے اپنے بیان میں کہا کہ مسئلہ کشمیر ایک دیرینہ اور حساس تنازع ہے، جس کے جنوبی ایشیا سمیت عالمی امن پر گہرے اثرات مرتب ہوتے ہیں۔ پاکستان اس مؤقف کا اعادہ کرتا ہے کہ یہ مسئلہ اقوام متحدہ کی سلامتی کونسل کی قراردادوں کے مطابق حل کیا جانا چاہیے۔
ترجمان کا کہنا تھا کہ کشمیری عوام کے بنیادی انسانی حقوق، خصوصاً حقِ خودارادیت کو یقینی بنایا جانا ضروری ہے۔ دفتر خارجہ نے امریکی صدر کے اس بیان کو مثبت قدم قرار دیا جس میں انہوں نے مسئلہ کشمیر کے حل کے لیے پاکستان اور بھارت کے ساتھ مل کر کام کرنے کا عندیہ دیا۔
مزید کہا گیا کہ پاکستان جنگ بندی میں امریکہ سمیت دیگر دوست ممالک کے تعمیری کردار کو قدر کی نگاہ سے دیکھتا ہے، جو خطے میں کشیدگی میں کمی اور پائیدار امن کے قیام کی طرف ایک اہم پیش رفت ہے۔
دفتر خارجہ کے ترجمان نے یہ بھی کہا کہ پاکستان امریکہ کے ساتھ تعلقات کو مزید مضبوط بنانے کا خواہاں ہے، خصوصاً تجارت، سرمایہ کاری اور اقتصادی شراکت داری کے میدانوں میں تعاون کو مزید فروغ دیا جائے گا۔
واضح رہے کہ امریکی صدر ڈونلڈ ٹرمپ نے اپنے سوشل میڈیا پلیٹ فارم ‘ٹروتھ سوشل’ پر جاری ایک بیان میں کہا تھا کہ وہ پاکستان اور بھارت کے ساتھ مل کر مسئلہ کشمیر کے دیرینہ تنازع کا حل تلاش کرنے کی کوشش کریں گے تاکہ “ہزاروں سال بعد” بھی اس تنازع کا خاتمہ ممکن ہو سکے۔
0
