مظفرآباد: لائن آف کنٹرول پر پاک فوج کے تباہ کن جوابی حملوں کے بعد بھارتی فوج نے چورا کمپلیکس پر سفید جھنڈا لہرا کر شکست تسلیم کر لی ہے۔
سکیورٹی ذرائع کے مطابق پاکستانی افواج کی جوابی کارروائیوں میں دشمن کی کئی اہم پوسٹس اور عسکری تنصیبات کو بھاری نقصان پہنچا، جس کے نتیجے میں بھارتی فوج نے ہاتھ کھڑے کر دیئے۔ یہ فیصلہ کن لمحہ چورا کمپلیکس میں پیش آیا جہاں دشمن نے سفید پرچم لہرا کر اپنی ہزیمت کا اعتراف کیا۔
بھارتی بزدلانہ حملوں کا منہ توڑ جواب
واضح رہے کہ بھارت نے گزشتہ رات احمدپور شرقیہ، مظفرآباد، باغ، کوٹلی اور مریدکے میں بزدلانہ فضائی حملے کیے، جن کا فوری اور فیصلہ کن جواب پاک فوج اور فضائیہ نے دیا۔ پاکستان نے بھارت کے 5 جنگی طیارے تباہ کر دیے جبکہ متعدد چیک پوسٹوں کو صفحہ ہستی سے مٹا دیا۔
پاکستانی قیادت کا ردعمل: بھارت کو مہنگی پڑی جارحیت
وفاقی وزیر دفاع خواجہ آصف نے کہا کہ بھارت کو اپنی جارحیت کا خمیازہ بھگتنا پڑا ہے۔ ان کا کہنا تھا کہ پاکستان نے دشمن پر واضح برتری حاصل کی ہے، بھارتی فوجی پوسٹیں چھوڑ کر بھاگ گئے ہیں اور بھارت نے ہم پر جنگ مسلط کی ہے۔
دوسری جانب وفاقی وزیر اطلاعات عطاء اللہ تارڑ نے کہا کہ بھارت کے لیے یہ شرمناک مقام ہے کہ اسے سفید جھنڈا لہرانا پڑا۔ انہوں نے مزید کہا کہ پاکستان نے 5 بھارتی جہاز مار گرائے اور پوری قوم اور افواج پاکستان کا مورال بلند ہے۔
بھارتی میڈیا کا اعتراف
بھارتی میڈیا نے بھی بالآخر تسلیم کر لیا ہے کہ پاکستان نے ان کے جنگی طیارے تباہ کیے ہیں۔ بھارتی حملے کے وقت کی بزدلی اور رات کے اندھیرے کا سہارا لینا بھی ان کی کمزوری کا ثبوت ہے۔
0
