ملتان:پی ایس ایل 10: پاکستان سپر لیگ سیزن 10 کے 25ویں میچ میں پشاور زلمی نے شاندار کارکردگی کا مظاہرہ کرتے ہوئے ملتان سلطانز کو 7 وکٹوں سے شکست دے دی۔ زلمی نے 109 رنز کا ہدف صرف 13 اوورز میں تین وکٹوں کے نقصان پر حاصل کر لیا۔
پشاور زلمی کی جانب سے صائم ایوب 49 رنز کے ساتھ نمایاں بلے باز رہے جبکہ میکس برائنٹ نے 38 رنز کی دھواں دار اننگ کھیلی۔ محمد حارث 7 رنز کے ساتھ ناٹ آؤٹ رہے، جب کہ کپتان بابراعظم صرف 8 رنز بنا کر آؤٹ ہوئے۔ مچل اوون 1 رن پر پویلین لوٹے۔
اس سے قبل ملتان سلطانز کے کپتان محمد رضوان نے ٹاس جیت کر بیٹنگ کا فیصلہ کیا، لیکن ٹیم کی بیٹنگ لائن مکمل طور پر ناکام رہی۔ پوری ٹیم 19.1 اوورز میں صرف 108 رنز بنا سکی۔
ملتان سلطانز کی جانب سے شائی ہوپ 23 اور طیب طاہر 22 رنز بنا کر نمایاں رہے، جب کہ رضوان نے 17، یاسر خان نے 10، محمد حسنین نے 11 اور ڈیوڈ ویلی نے 8 رنز بنائے۔
پشاور زلمی کے باؤلرز نے شاندار کارکردگی دکھائی، احمد دانیال نے 3 وکٹیں، معاذ صداقت اور لیوک ووڈ نے 2،2 جبکہ الزاری جوزف، صائم ایوب اور علی رضا نے ایک ایک وکٹ حاصل کی۔
پشاور زلمی کی اس جیت کے ساتھ پلے آف مرحلے میں ان کی پوزیشن مزید مضبوط ہو گئی ہے۔
0
