راولپنڈی: ترجمان پاک فوج لیفٹیننٹ جنرل احمد شریف چودھری نے تصدیق کی ہے کہ 6 اور 7 مئی کی درمیانی شب بھارت کی جانب سے مختلف علاقوں پر بزدلانہ حملے کیے گئے، جن میں مجموعی طور پر 26 پاکستانی شہید اور 46 زخمی ہوئے ہیں۔
ڈی جی آئی ایس پی آر نے بتایا کہ بھارت نے جان بوجھ کر عبادت گاہوں، مساجد، شہری علاقوں اور آبی تنصیبات کو نشانہ بنایا۔ ان حملوں میں بچوں، خواتین اور معصوم شہریوں کی جانیں ضائع ہوئیں، جو بین الاقوامی قوانین اور جنگی اصولوں کی کھلی خلاف ورزی ہے۔
علاقہ وار تفصیلات:
احمد پور شرقیہ:
مسجد سبحان اللہ پر حملے میں 13 افراد شہید ہوئے، جن میں 3 سال کی 2 بچیاں، 7 خواتین اور 4 مرد شامل ہیں۔ 31 شہری زخمی ہوئے اور 4 فیملی کوارٹرز کو نقصان پہنچا۔
مظفر آباد:
مسجد بلال کو نشانہ بنایا گیا، 7 حملوں میں 3 شہری شہید اور ایک بچی زخمی ہوئی، جبکہ مسجد مکمل طور پر تباہ ہو گئی۔
کوٹلی:
مسجد عباس پر 5 حملے کیے گئے، 16 سالہ لڑکی اور 18 سالہ لڑکا شہید ہوئے، ایک ماں اور بیٹی زخمی ہوئیں۔
مریدکے:
مسجد ام القریٰ کو نشانہ بنایا گیا، 3 مرد شہید، ایک زخمی اور 2 شہری لاپتہ ہیں۔ مسجد اور اردگرد کے علاقے کو نقصان پہنچا۔
سیالکوٹ:
کوٹلی لوہاراں میں 2 حملے ہوئے، ایک گولہ فیلڈ میں گرا اور دوسرا مس فائر ہوا، کوئی جانی نقصان نہیں ہوا۔
شکر گڑھ:
دو حملوں میں کوئی جانی نقصان نہیں ہوا تاہم ایک ڈسپنسری کو نقصان پہنچا۔
لائن آف کنٹرول (ایل او سی):
بلااشتعال بھارتی فائرنگ کے نتیجے میں 5 شہری شہید ہوئے، جن میں ایک 5 سال کا بچہ بھی شامل ہے۔
بھارتی طیاروں کو منہ توڑ جواب
لیفٹیننٹ جنرل احمد شریف چودھری نے بتایا کہ پاک فضائیہ نے دشمن کے 5 طیارے اور ایک ڈرون مار گرایا۔ یہ کارروائی اس وقت کی گئی جب بھارتی طیارے پاکستان کی حدود میں داخل ہوئے۔ انہوں نے کہا کہ بھارت بلاثبوت الزامات لگا رہا ہے، جبکہ پاکستانی افواج نے جارحیت کا فوری اور مؤثر جواب دیا۔
ہائیڈرو پروجیکٹس پر حملہ – خطرناک رجحان
ڈی جی آئی ایس پی آر نے انکشاف کیا کہ بھارت نے نیلم جہلم ہائیڈرو پروجیکٹ اور نوسیری ڈیم کو بھی نشانہ بنایا، جس سے بنیادی ڈھانچے کو نقصان پہنچا۔ انہوں نے کہا کہ آبی تنصیبات کو نشانہ بنانا بین الاقوامی قوانین اور جنگی روایات کی کھلی خلاف ورزی ہے۔
پیغامِ عزم
ترجمان پاک فوج نے کہا کہ ملک کی خودمختاری اور سالمیت کیلئے جان دینا ہمارا نصب العین ہے۔ افواج پاکستان قوم کی حمایت سے دشمن کی ہر جارحیت کا جواب دے رہی ہیں اور دیتی رہیں گی۔ بھارت کی غلط فہمی کو جلد دور کر دیا جائے گا۔
0
