راولپنڈی: (نیا محاذ) عوامی مسلم لیگ کے سربراہ اور سابق وفاقی وزیر شیخ رشید احمد نے کہا ہے کہ پاکستانی قوم اپنے وطن کے چپے چپے کی حفاظت کرنا جانتی ہے اور اگر بھارت نے جارحیت کی تو ہر بچہ، ہر فرد ملک کی سلامتی کے لیے میدان میں ہوگا۔
راولپنڈی کی انسداد دہشت گردی عدالت کے باہر میڈیا سے گفتگو کرتے ہوئے شیخ رشید نے کہا کہ پاکستان کے لیے جان دینے کا جذبہ ہر شہری کے دل میں موجود ہے، اور قوم وقت آنے پر دشمن کو اس کی اوقات یاد دلا سکتی ہے۔
انہوں نے کہا کہ بھارت ایک جانب جنگ کی بات کرتا ہے اور دوسری جانب مذاکرات کی کوششیں بھی کر رہا ہے، جو اس کے دوغلے پن کا ثبوت ہے۔ ان کے بقول، پاکستان امن کا خواہاں ضرور ہے، لیکن کسی بھی جارحیت کا منہ توڑ جواب دینے کی مکمل صلاحیت رکھتا ہے۔
شیخ رشید نے امید ظاہر کی کہ معاملات جنگ کی طرف نہیں جائیں گے کیونکہ اگر ایسا ہونا ہوتا تو اب تک حالات بگڑ چکے ہوتے۔ تاہم انہوں نے خبردار کیا کہ پاکستانی قوم کو للکارا گیا تو پوری قوم سیسہ پلائی دیوار بن کر دشمن کے سامنے کھڑی ہوگی۔
0
