کراچی: (نیا محاذ) کراچی کے علاقے گلشن حدید میں افسوسناک حادثے کے دوران شکار پور سے آنے والی مسافر بس الٹ گئی، جس کے نتیجے میں 4 افراد جاں بحق جبکہ متعدد زخمی ہو گئے۔
ٹریفک پولیس کے مطابق بس جب سمندری بابا مزار کے قریب پہنچی تو اچانک کھائی میں جا گری اور الٹ گئی۔ ریسکیو حکام کے مطابق جاں بحق افراد میں 2 خواتین اور 2 مرد شامل ہیں، جن کی شناخت پنا زوجہ محمد علی (60 سال)، کوثر (35 سال)، عبدالغفور (59 سال) اور غلام فرید (25 سال) کے ناموں سے ہوئی ہے.
حادثے کے بعد لاشوں اور 8 زخمی افراد کو جناح اسپتال منتقل کر دیا گیا، جہاں زخمیوں کو طبی امداد دی جا رہی ہے۔
ادھر گلشن حدید ہی کے علاقے نصیر آباد میں ایک اور حادثہ پیش آیا، جہاں آئل ٹینکر نے چنگچی رکشے کو ٹکر مار دی۔ حادثے میں دو افراد زخمی ہوئے جبکہ رکشے میں سوار سکول کے بچے معجزانہ طور پر محفوظ رہے۔ زخمیوں کو قریبی اسپتال منتقل کیا گیا ہے۔
یہ واقعات شہریوں کی جان و مال کے تحفظ کیلئے سڑکوں پر حفاظتی اقدامات کی فوری ضرورت کو اجاگر کرتے ہیں۔
0
