لاہور: (نیا محاذ) وزیراعلیٰ پنجاب مریم نواز شریف کی زیر صدارت لاہور ڈویلپمنٹ پلان پر خصوصی اجلاس ہوا، جس میں پراجیکٹس کی پیش رفت کا جائزہ لیا گیا۔
مریم نواز شریف نے سینئر وزیر اور چیف سیکرٹری کو لاہور ڈویلپمنٹ کی بروقت تکمیل کا ٹاسک سونپتے ہوئے منصوبے کیلئے ماہانہ ٹائم لائن مقرر کرنے کی ہدایت کی۔ اجلاس میں لاہور ڈویلپمنٹ پلان کے پہلے فیز کی مرحلہ وار پیش رفت کا بھی جائزہ لیا گیا، اور وزیراعلیٰ نے پراجیکٹس کا تصویری معائنہ بھی کیا۔
میونسپل کارپوریشن لاہور کی 3705 سٹریٹس اور واسا کے زیر اہتمام 230 سٹریٹس کی تعمیر و بحالی کیلئے 30 جون کی ڈیڈ لائن مقرر کی گئی ہے، جبکہ واسا ورکس کیلئے 1573 گلیوں کی تعمیر و مرمت کیلئے 31 جولائی کی حتمی ڈیڈ لائن دی گئی ہے۔
لاہور ڈویلپمنٹ پلان فیز ٹو میں علامہ اقبال ٹاؤن، عزیز بھٹی ٹاؤن اور واہگہ ٹاؤن میں گلیوں کی تعمیر و مرمت اور دیگر اہم پراجیکٹس شامل ہیں۔
وزیراعلیٰ نے کہا کہ ترقیاتی منصوبوں کی تکمیل میں تاخیر سے عوام کی روزمرہ زندگی متاثر ہوتی ہے اور وہ خود کو عوام کے سامنے جوابدہ سمجھتی ہیں۔
0
