آئی ایم ایف کی علاقائی معاشی رپورٹ جاری، پاکستان کی شرح نمو میں بہتری کی توقع

اسلام آباد: (نیا محاذ) بین الاقوامی مالیاتی فنڈ (آئی ایم ایف) نے ریجنل اکنامک آؤٹ لک 2025 رپورٹ جاری کر دی، جس میں پاکستان کی آئندہ مالی سالوں میں معاشی ترقی کی بہتری کی امید ظاہر کی گئی ہے۔
رپورٹ کے مطابق رواں مالی سال کے دوران پاکستان کی شرح نمو 2.6 فیصد رہنے کی توقع ہے، جبکہ آئندہ مالی سال میں یہ شرح 3.6 فیصد تک پہنچ سکتی ہے۔ یاد رہے کہ اس سے پہلے آئی ایم ایف نے رواں مالی سال کیلئے 3.2 فیصد اور آئندہ مالی سال کیلئے 4 فیصد شرح نمو کی پیش گوئی کی تھی۔
آئی ایم ایف نے اپنی رپورٹ میں کہا کہ مہنگائی میں کمی کے باعث پالیسی ریٹ میں کمی کی گئی ہے، جبکہ مالی سال کی پہلی ششماہی میں معاشی سرگرمیاں سست روی کا شکار رہیں، تاہم دوسری ششماہی میں معاشی بہتری کی توقع ہے۔
رپورٹ میں خبردار کیا گیا ہے کہ پاکستان کو قرض حاصل کرنے کیلئے زیادہ لاگت کا سامنا کرنا پڑ سکتا ہے۔ مالیاتی خسارے کے حوالے سے بتایا گیا ہے کہ رواں مالی سال پاکستان کو 3.6 فیصد جبکہ آئندہ مالی سال 3.4 فیصد مالیاتی خسارے کا سامنا ہو سکتا ہے۔
مزید کہا گیا ہے کہ پاکستان کی شرح نمو ایران اور عراق سے زیادہ رہے گی، جبکہ یو ایس انتظامیہ کی جانب سے ٹیرف میں اضافے کے باعث خطے کی برآمدات متاثر ہونے کا خدشہ ہے۔
آئی ایم ایف کی رپورٹ میں بتایا گیا کہ مصر، اردن اور پاکستان کیلئے 2024 سے 14.8 ارب ڈالر کے قرضے منظور کیے گئے ہیں، اور ادارہ ان ممالک کی پالیسی مشاورت اور مالی امداد کے ذریعے مدد جاری رکھے گا۔