پاکستان اسٹاک مارکیٹ میں شدید مندی، سرمایہ کاروں کو اربوں روپے کا نقصان

کراچی: (نیا محاذ) پاکستان اسٹاک مارکیٹ میں پیر کے روز زبردست اتار چڑھاؤ دیکھا گیا، جہاں دن کا آغاز مثبت رجحان سے ہوا لیکن اختتام مندی کے ساتھ ہوا، جس کے باعث سرمایہ کاروں کو اربوں روپے کا نقصان اٹھانا پڑا۔
کاروباری ہفتے کے پہلے روز مارکیٹ نے دن کا آغاز 1100 پوائنٹس سے زائد اضافے کے ساتھ کیا اور 100 انڈیکس 1,16,658 پوائنٹس کی بلند ترین سطح تک جا پہنچا۔ تاہم، ٹریڈنگ کے دوران اچانک منفی رجحان غالب آ گیا اور مارکیٹ شدید مندی کی لپیٹ میں آ گئی۔
کاروباری دن کے اختتام پر 100 انڈیکس 1405 پوائنٹس کی کمی کے ساتھ 1,14,063 پوائنٹس پر بند ہوا۔ یاد رہے کہ گزشتہ ہفتے کے اختتامی روز مارکیٹ 449 پوائنٹس کے اضافے کے ساتھ 1,15,469 پوائنٹس پر بند ہوئی تھی۔
آج کے دن اسٹاک مارکیٹ میں 20 ارب 54 کروڑ 56 لاکھ روپے مالیت کے 19 کروڑ 2 لاکھ سے زائد شیئرز کا لین دین ہوا، جو سرمایہ کاروں کے اعتماد میں اچانک کمی کا واضح اشارہ ہے۔
تجزیہ کاروں کا کہنا ہے کہ اسٹاک مارکیٹ میں اس اچانک مندی کی وجوہات میں بین الاقوامی مالیاتی صورتحال، سیاسی بے یقینی، اور معاشی پالیسیاں شامل ہو سکتی ہیں۔ سرمایہ کاروں کو فی الحال محتاط رہنے کا مشورہ دیا جا رہا ہے۔