چیٹ جی پی ٹی دنیا کی سب سے زیادہ ڈاؤن لوڈ ہونے والی ایپ بن گئی

کیلیفورنیا (نیا محاذ) – چیٹ جی پی ٹی:جدید ٹیکنالوجی کی دنیا میں ایک اور انقلابی موڑ آ گیا، جب چیٹ جی پی ٹی نے مقبولیت میں سب کو پیچھے چھوڑتے ہوئے دنیا کی سب سے زیادہ ڈاؤن لوڈ ہونے والی ایپ کا اعزاز حاصل کر لیا۔
ایپ انٹیلیجنس فرم ایپ فیگرز کے مطابق مارچ 2025ء میں چیٹ جی پی ٹی کو ایپ اسٹور اور گوگل پلے پر مجموعی طور پر 4 کروڑ 60 لاکھ بار ڈاؤن لوڈ کیا گیا۔ اس طرح اس نے پہلی مرتبہ انسٹاگرام اور ٹک ٹاک جیسے عالمی دیو ایپس کو بھی مات دے دی۔
رپورٹ کے مطابق چیٹ جی پی ٹی کی انسٹالز میں فروری کے مقابلے میں 28 فیصد اضافہ دیکھا گیا، جبکہ سال 2025ء کی پہلی سہ ماہی میں گزشتہ سال کی اسی مدت کے مقابلے میں 148 فیصد اضافہ ریکارڈ کیا گیا ہے۔
دلچسپ بات یہ ہے کہ انسٹاگرام نے بھی اندازاً اتنی ہی ڈاؤن لوڈز حاصل کیں، لیکن معمولی فرق سے چیٹ جی پی ٹی بازی لے گئی۔ ٹک ٹاک جو فروری میں پہلے نمبر پر تھی، مارچ میں تیسرے نمبر پر چلی گئی، جبکہ فیس بک اور واٹس ایپ بالترتیب چوتھے اور پانچویں نمبر پر رہیں۔
ٹیکنالوجی ویب سائٹ ٹیک کرنچ کا کہنا ہے کہ چیٹ جی پی ٹی کی یہ کامیابی کئی اہم اپڈیٹس کے بعد سامنے آئی، خاص طور پر امیج جنریشن میں ایک سال بعد نئی اپڈیٹ نے صارفین کو گھبلی اسٹائل میمز اور تصاویر بنانے کی سہولت دی، جس کا نیا ٹرینڈ دنیا بھر میں مقبول ہو رہا ہے۔
ایپ فیگرز کا ماننا ہے کہ اگر یہی رفتار برقرار رہی، تو آئندہ مہینوں میں بھی چیٹ جی پی ٹی سرفہرست رہے گی۔
رپورٹ کے مطابق مارچ میں دنیا بھر میں ٹاپ 10 ایپس کی مجموعی ڈاؤن لوڈز 33 کروڑ 90 لاکھ رہی، جو کہ فروری کے 29 کروڑ 90 لاکھ سے واضح طور پر زیادہ ہیں، جس سے ظاہر ہوتا ہے کہ عالمی سطح پر موبائل ایپ کا استعمال بھی مسلسل بڑھ رہا ہے۔