لاس اینجلس: (نیا محاذ)128 سال بعد کرکٹ: انٹرنیشنل اولمپکس کمیٹی (او آئی سی) نے 2028 کے لاس اینجلس اولمپکس میں کرکٹ کے سنسنی خیز مقابلوں کی میزبانی کے لیے گراؤنڈ کا اعلان کر دیا ہے۔ یہ تاریخی قدم 128 سال بعد کرکٹ کو ایک بار پھر اولمپکس میں واپس لا رہا ہے۔
میڈیا رپورٹس کے مطابق جنوبی کیلیفورنیا کے علاقے پومونا میں واقع “فیئر پلیکس” گراؤنڈ کو اولمپکس کرکٹ ایونٹس کی میزبانی کیلئے منتخب کیا گیا ہے۔ تقریباً 500 ایکڑ پر پھیلا یہ گراؤنڈ 1922 سے مختلف ثقافتی و کھیلوں کی سرگرمیوں کا مرکز رہا ہے اور اب یہاں کرکٹ کی واپسی ایک نئے دور کا آغاز کرے گی۔
لاس اینجلس اولمپکس 2028 کے سی ای او رینالڈ ہوور نے کہا ہے کہ دنیا کو ایک یادگار اولمپک گیمز فراہم کرنے کا وعدہ کیا ہے اور اس پر بھرپور کام ہو رہا ہے۔ اس موقع پر انٹرنیشنل کرکٹ کونسل (آئی سی سی) کے چیئرمین جے شاہ نے اس پیشرفت کا خیرمقدم کیا اور اسے کرکٹ کی مقبولیت بڑھانے کے لیے ایک تاریخی موقع قرار دیا۔
یاد رہے کہ گزشتہ ہفتے او آئی سی نے فیصلہ کیا تھا کہ لاس اینجلس اولمپکس 2028 میں کرکٹ ٹی 20 فارمیٹ میں شامل ہو گی، جس میں مینز اور ویمنز کی 6، 6 ٹیمیں حصہ لیں گی۔ ہر ٹیم 15 کھلاڑیوں پر مشتمل ہو گی، جبکہ مجموعی طور پر 90، 90 کھلاڑیوں کا کوٹہ مختص کیا جائے گا۔
دلچسپ بات یہ ہے کہ کرکٹ تقریباً 128 سال بعد ایک بار پھر اولمپکس کا حصہ بننے جا رہی ہے۔ اس سے قبل کرکٹ صرف ایک بار، 1900 کے پیرس اولمپکس میں کھیلی گئی تھی، جس کے بعد یہ کھیل اولمپکس سے باہر رہا۔ کرکٹ کی دوبارہ شمولیت نہ صرف کھیل کے شائقین کے لیے خوشخبری ہے بلکہ اس سے دنیا بھر میں کرکٹ کی نئی جہتیں بھی کھلنے کی امید ہے۔
رپورٹ: نیا محاذ
0
