اسلام آباد (نیا محاذ) –عمران خان نااہلی کیس: بانی تحریک انصاف عمران خان کی نااہلی کے خلاف فیض آباد احتجاج پر درج مقدمے میں انسداد دہشتگردی عدالت اسلام آباد نے ایک بار پھر ملزمان پر فرد جرم عائد کرنے کی کارروائی مؤخر کر دی۔
انسداد دہشتگردی عدالت کے جج طاہر عباس سپرا نے کیس کی سماعت کی۔ پی ٹی آئی رہنما فیصل جاوید کی جانب سے حاضری سے استثنیٰ کی درخواست دی گئی، جسے عدالت نے منظور کر لیا۔ دیگر ملزمان کی نمائندگی وکلاء سردار مصروف خان اور زاہد بشیر ڈار نے کی۔
سماعت کے دوران عامر محمود کیانی عدالت میں پیش ہوئے تو جج نے ریمارکس دیے کہ “دو مرتبہ اشتہاری قرار دینے کی کارروائی شروع ہوئی تو آپ پیش ہو گئے؟ اب حوالات بھیجوں گا، کوئی اور راستہ نہیں۔” تاہم عدالت نے ایک لاکھ روپے کے مچلکوں کے عوض ان کی عبوری ضمانت منظور کر لی۔
سابق ڈپٹی اسپیکر واثق قیوم عباسی کو اشتہاری قرار دینے کی کارروائی کا آغاز کر دیا گیا جبکہ دیگر غیر حاضر ملزمان کے وارنٹ گرفتاری جاری کر دیے گئے۔ عدالت نے وارننگ دی کہ آئندہ سماعت پر جو ملزم پیش نہیں ہوا، اس کے خلاف سخت کارروائی عمل میں لائی جائے گی۔
عدالت نے کیس کی مزید سماعت 23 اپریل تک ملتوی کر دی۔ واضح رہے کہ فیصل جاوید، واثق قیوم اور دیگر پی ٹی آئی رہنما اس مقدمے میں نامزد ہیں، جو تھانہ آئی-9 اسلام آباد میں درج ہے۔
0
