نیامحاذ: کراچی کے ضلع شرقی کی عدالت نے صحافی فرحان ملک کی ضمانت منظور کر لی ہے۔ یہ ضمانت ریاست مخالف پروگرام کے مقدمے میں دی گئی۔ عدالت نے ایک لاکھ روپے کے مچلکوں کے عوض فرحان ملک کی ضمانت منظور کی۔
کیس کا پس منظر
فرحان ملک، جو کہ ڈیجیٹل میڈیا پلیٹ فارم رفتار کے بانی اور سابقہ نجی ٹی وی کے ڈائریکٹر نیوز ہیں، کو ایف آئی اے سائبر کرائم کراچی نے 20 مارچ کو گرفتار کیا تھا۔ ان پر الزام تھا کہ انہوں نے ریاستی اداروں کے خلاف مواد اپ لوڈ کیا، جس کی تحقیقات گزشتہ تین ماہ سے جاری تھیں۔
یوٹیوب چینل پر مبینہ طور پر ریاست مخالف مواد اپ لوڈ کرنے کی وجہ سے ان کے خلاف الیکٹرانک کرائمز ایکٹ (پیکا) اور پاکستان پینل کوڈ کے تحت مقدمہ درج کیا گیا تھا۔
26 مارچ کو، جوڈیشل مجسٹریٹ ملیر کی عدالت نے انہیں 5 روز کے جسمانی ریمانڈ پر ایف آئی اے کے حوالے کر دیا تھا۔ اس سے قبل، جوڈیشل مجسٹریٹ ایسٹ نے فرحان ملک کی ضمانت کی درخواست مسترد کر دی تھی۔ تاہم، بعد ازاں انہوں نے ڈسٹرکٹ اینڈ سیشن جج ایسٹ سے درخواست کی، جس پر عدالت نے ایف آئی اے کو نوٹس جاری کیا۔
ایف آئی آر کے مطابق، ایف آئی اے کو رفتار ٹی وی کے یوٹیوب چینل سے متعلق ایک رپورٹ موصول ہوئی، جس میں کہا گیا کہ وہاں ویڈیوز کے ذریعے ریاست مخالف مہم چلائی جا رہی تھی۔
