نیامحاذ: ڈیرہ اسماعیل خان کے علاقے تکواڑہ میں سکیورٹی فورسز نے انٹیلی جنس اطلاعات پر کامیاب آپریشن کرتے ہوئے دہشت گرد تنظیم فتنہ الخوارج کے 9 خطرناک دہشتگردوں کو جہنم واصل کر دیا۔
پاک فوج کے شعبہ تعلقات عامہ (آئی ایس پی آر) کے مطابق یہ آپریشن خفیہ اطلاعات کی بنیاد پر کیا گیا، جس میں فورسز نے دہشتگردوں کے ٹھکانے کو مؤثر انداز میں نشانہ بنایا۔ شدید فائرنگ کے تبادلے میں 9 دہشتگرد مارے گئے، جن میں ایک انتہائی مطلوب خارجی سرغنہ “شیرین” بھی شامل تھا۔
آئی ایس پی آر کے مطابق ہلاک ہونے والے دہشتگردوں کے قبضے سے بھاری مقدار میں اسلحہ اور گولہ بارود بھی برآمد ہوا۔ شیرین، قانون نافذ کرنے والے اداروں کو متعدد سنگین وارداتوں، شہریوں کی ٹارگٹ کلنگ اور 20 مارچ 2025 کو کیپٹن حسنین اختر شہید کے سانحہ میں ملوث ہونے پر انتہائی مطلوب تھا۔
ترجمان کا کہنا تھا کہ یہ آپریشن نہ صرف ایک سنگین جرم کا جواب تھا بلکہ ملک دشمن عناصر کے خلاف سکیورٹی فورسز کے عزم کی واضح مثال بھی ہے۔
علاقے میں سرچ اور کلیئرنس آپریشن تاحال جاری ہے تاکہ کسی بھی بچے ہوئے دہشتگرد کو انجام تک پہنچایا جا سکے۔ پاکستان کی سکیورٹی فورسز دہشت گردی کے مکمل خاتمے کے لیے پرعزم ہیں۔
