نیامحاذ: لاہور میں نظر بندی قانون کے سیکشن تین کے خلاف درخواستوں پر سماعت کے لیے لاہور ہائیکورٹ کا پانچ رکنی بنچ تحلیل ہوگیا۔ چیف جسٹس مس عالیہ نیلم کی سربراہی میں بنچ نے اس کیس کی سماعت شروع کی، لیکن پانچ رکنی بنچ کے ممبر جسٹس خالد اسحاق نے کیس سننے سے معذرت کر لی، جس کے نتیجے میں بنچ تحلیل ہوگیا۔
اب چیف جسٹس مس عالیہ نیلم اس کیس کی سماعت کے لیے نیا لارجر بنچ تشکیل دیں گی۔ جسٹس فاروق حیدر نے اس کیس کے دوران ریمارکس دیے کہ معزز جج صاحب 27 اے کے نوٹس کے تحت رپورٹ فائل کر چکے ہیں۔
یاد رہے کہ چیف جسٹس لاہور ہائیکورٹ نے 24 مارچ کو نظر بندی قانون معطل ہونے کے متعلق پنجاب حکومت کی درخواست پر کیس کی جلد سماعت کی درخواست منظور کی تھی، اور 27 مارچ کو مرکزی کیس کی سماعت کے لیے مقرر کرنے کا حکم دیا تھا۔
پنجاب حکومت کے وکیل نے عدالت میں موقف اپنایا کہ عدالت نے زینب عمیر اور دیگر کی درخواست پر نظر بندی قانون کے سیکشن تین کو معطل کر رکھا ہے، اور استدعا کی کہ کیس کو جلد سماعت کے لیے مقرر کیا جائے۔
