نیامحاذ: اسلام آباد میں سابق خاتون اول بشریٰ بی بی نے اڈیالہ جیل میں بہتر سہولیات کی فراہمی کے لیے اسلام آباد ہائی کورٹ سے رجوع کیا ہے۔ بشریٰ بی بی نے اپنے وکلاء کے ذریعے عدالت میں درخواست دائر کرتے ہوئے مؤقف اپنایا کہ وہ بطور خاتون اول وزیر اعظم ہاؤس میں مقیم رہ چکی ہیں، اور اپنی بہتر معیار زندگی کی وجہ سے قانون کے مطابق وہ بہتر سہولتوں کی حقدار ہیں۔
درخواست میں بشریٰ بی بی نے کہا کہ انہوں نے جیل حکام سے بہتر سہولتوں کی درخواست کی تھی، لیکن سپرنٹنڈنٹ اڈیالہ جیل نے ان کی درخواست پر کوئی کارروائی نہیں کی۔ بشریٰ بی بی کے شوہر عمران خان، جو پی ٹی آئی کے بانی ہیں، کو اسی جیل میں بہتر سہولتیں فراہم کی گئی ہیں، اور اس صورت حال میں فریقین کو اپنی قانونی ذمہ داریوں کو پورا کرنے کی ہدایت کی گئی ہے۔
بشریٰ بی بی نے اپنی درخواست میں استدعا کی ہے کہ جیل رولز 1978 کے تحت انہیں بہتر سہولتوں کی فراہمی کا حکم دیا جائے۔ درخواست میں وفاق، سپرنٹنڈنٹ اڈیالہ جیل اور چیف کمشنر اسلام آباد کو فریق بنایا گیا ہے۔ بشریٰ بی بی اس وقت اڈیالہ جیل میں 190 ملین پاؤنڈ کیس میں 7 سال کی قید کی سزا کاٹ رہی ہیں۔
