سپر لیوی ٹیکس کیس: سپریم کورٹ میں حکومت کے ٹیکس اخراجات پر سوالات اٹھ گئے
اسلام آباد (نیامحاذ) – سپریم کورٹ کے آئینی بینچ میں سپر لیوی ٹیکس کیس کی سماعت کے دوران کمپنیوں کے وکیل مخدوم علی خان نے حکومت سے ٹیکس کی رقم کے استعمال کی تفصیلات نہ ہونے کا معاملہ اٹھایا۔
نجی ٹی وی سما نیوز کے مطابق، وکیل مخدوم علی خان نے مؤقف اختیار کیا کہ یہ ٹیکس قدرتی آفات سے متاثرہ علاقوں کی بحالی کے لیے استعمال ہونا تھا، لیکن 2015 سے لے کر اب تک کہیں بھی اس کے اخراجات کی تفصیلات فراہم نہیں کی گئیں۔ انہوں نے عدالت کو آگاہ کیا کہ سپریم کورٹ کے سابقہ فیصلے پر بھی عملدرآمد نہیں کیا گیا۔
ججز کے سخت سوالات
سماعت کے دوران جسٹس جمال خان مندوخیل نے سوال کیا:
“اگر کل کو اسی طرح کا کوئی اور قانون آئے اور پارلیمنٹ کے دونوں ایوانوں سے منظور ہو جائے تو کیا وہ قانون بن جائے گا؟”
اس پر مخدوم علی خان نے جواب دیا کہ “قانون بنانے سے پہلے ایک مناسب پالیسی ترتیب دینا ضروری ہوتا ہے۔”
جسٹس محمد علی مظہر نے وکیل سے استفسار کیا کہ “کیا آپ نے کراچی اور پشاور ہائی کورٹ کے فیصلے دیکھے ہیں؟” وکیل نے جواب دیا کہ “دونوں عدالتی فیصلوں میں وکلا کے دلائل ایک جیسے ہیں۔”
سماعت کل تک ملتوی
سپریم کورٹ کے آئینی بینچ نے کیس کی مزید سماعت کل تک ملتوی کر دی، جہاں مخدوم علی خان اپنے دلائل جاری رکھیں گے۔
