لاہور (نیوز ڈیسک) – سوشل میڈیا پر منفی پروپیگنڈا کرنے کے الزام میں پی ٹی آئی کے مزید 15 افراد کو طلبی کے نوٹس جاری کر دیے گئے۔
ذرائع کے مطابق وفاقی حکومت کی قائم کردہ مشترکہ تحقیقاتی ٹیم (جے آئی ٹی) نے ان افراد کو تحقیقات کے لیے طلب کیا ہے۔ طلب کیے گئے افراد میں گوہر علی خان، سلمان اکرم راجہ، رؤف حسن، سید فردوس شمیم نقوی، محمد خالد خورشید خان، میاں محمد اسلم اقبال، محمد حماد اظہر، عون عباس، عالیہ حمزہ ملک، محمد شہباز شبیر، وقاص اکرم، کنول شوذب، تیمور سلیم خان، اسد قیصر اور شاہ فرمان شامل ہیں۔
ذرائع کا کہنا ہے کہ جے آئی ٹی کے پاس ان افراد کے خلاف تحقیقات کے لیے شواہد موجود ہیں اور ان سے ریاست مخالف پروپیگنڈے کے الزامات پر پوچھ گچھ کی جائے گی۔ تمام افراد کو 7 مارچ 2025ء دوپہر 12 بجے جے آئی ٹی کے سامنے پیش ہونے کا حکم دیا گیا ہے۔
یاد رہے کہ جے آئی ٹی الیکٹرانک جرائم کی روک تھام ایکٹ 2016 کے سیکشن 30 کے تحت تشکیل دی گئی تھی اور انسپکٹر جنرل آف پولیس، اسلام آباد کی سربراہی میں تحقیقات کر رہی ہے۔ اس کا مقصد قانون کے مطابق ملوث افراد کے خلاف کارروائی کی سفارش کرنا ہے۔
اس سے قبل، جے آئی ٹی پی ٹی آئی کی سوشل میڈیا ٹیم کے 10 ارکان کو بھی طلبی کے نوٹس جاری کر چکی ہے۔
