فساد تھوڑی دیر کنٹرول ہو جائے تو پاکستان مزید ترقی کریگا: عظمیٰ بخاری

لاہور (نیا محاذ ) صوبائی وزیر اطلاعات ونشریات عظمیٰ بخاری نے کہا ہے کہ فساد تھوڑی دیر کنٹرول ہو جائے تو پاکستان مزید ترقی کرے گا۔
نجی ٹی وی دنیا نیوز کے مطابق لاہور میں پریس کانفرنس کرتے ہوئے صوبائی وزیر اطلاعات عظمیٰ بخاری کا کہنا تھا کہ وزیرعلیٰ مریم نواز 8 سے 15 تاریخ تک چائنہ کے سرکاری دورے پر تھیں، وزیراعلیٰ نے چائنہ کے 4شہروں کا دورہ کیاجہاں ان کی مختلف میٹنگز تھیں، مریم نواز پاکستان کی تاریخ کی واحد وزیراعلیٰ ہیں جن کو چین میں ہیڈ آف سٹیٹ کا پروٹوکول ملا۔
انہوں نے کہا کہ ایک صوبے کی وزیراعلیٰ کو چائنہ جیسے ملک میں ہیڈ آف سٹیٹ کا مرتبہ ملا، کچھ جاہلوں کا ٹیلی فون کوئی اٹھاتا نہیں تھا، یہ اپنی ساری حکومت میں فون کا انتظار کرتے کرتے گھروں کو چلے گئے، جاہلوں کی بستی ہے انہوں نے بس پراپیگنڈا کرنا ہوتا ہے، چین میں مسلم لیگ ن کو بطور پارٹی زیادہ ہائی لائٹ کیا گیا۔
عظمیٰ بخاری کا کہنا تھا کہ چائنہ کے صدر شی جن پنگ کے بعد وائس چیئرمین کا عہدہ ہے، وائس چیئرمین نے وزیراعلیٰ مریم نواز سے آدھے گھنٹے کی ملاقات شیڈول کی لیکن انہوں نے وزیراعلیٰ مریم نواز کو ایک گھنٹے کا وقت دیا، مریم نواز کے بارے میں کہا گیا آئندہ وقت میں بڑی لیڈر کے طور پر شمار ہوں گی۔
لیگی رہنما نے کہا کہ وزیراعلیٰ مریم نواز نے زرعی آلات بنانے والی کمپنی کا دورہ کیا، چین کے تو ٹریکٹرز بھی اب روبوٹس ہیں، وزیراعلیٰ نے چائنہ کو کہا کہ پنجاب میں ٹرانسپورٹ پر کام کرنا ہے، ہمیں 700 کے قریب چائنہ سے الیکٹرک بسیں خریدنی ہیں، جلد الیکٹرک بسوں کا پہلا فلیٹ لاہور پہنچنے والا ہے۔
وزیراطلاعات کا کہنا تھا کہ ہم نے 5 سالہ منصوبہ بنایا ہے، ہمیں ساری ٹرانسپورٹ کو الیکٹرک پر شفٹ کرنا ہے، وزیراعلیٰ نے جنکو کمپنی کو پنجاب میں سولر پلانٹ لگانے کی اجازت دی ہے، پنجاب میں سرمایہ کاری
کے حوالے سے 60 سے زیادہ کمپنیوں کا ریسپانس بہت اچھا تھا۔
عظمیٰ بخاری نے کہا کہ سکیورٹی کے حوالے سے کچھ خدشات رہتے ہیں، وزیراعلیٰ نے چینی سرمایہ کاروں کی سکیورٹی کو یقینی بنانے کا وعدہ کیا ہے، آپ جلد پنجاب میں چینی کمپنیوں کو کام کرتا دیکھیں گے، مریم نواز نے لاہور کو جدید ترین سمارٹ سٹی بنانے کا پلان بنایا ہے، لاہور جلد جدید ترین سمارٹ سٹی ہوگا۔
ان کا کہنا تھا کہ آپ کو جلد لاہور کی سڑکوں پر چارجنگ سٹیشن بھی نظر آئیں گے، بچوں کو دی جانے والی الیکٹرک وہیکلز کیلئے جلد چارجنگ سٹیشنز بنیں گے، وزیراعلیٰ مریم نواز نے پنجاب کو جدید ترین صوبہ بنانے کا عہد کیا ہے، فساد تھوڑی دیر کیلئے کنٹرول ہوجائے تو پاکستان مزید ترقی کرے گا۔