اسلام آباد (نیا محاذ )جسٹس منصور علی شاہ نے رجسٹرار سپریم کورٹ کو خط لکھتے ہوئے چیف جسٹس قاضی فائز عیسیٰ کے اعزاز میں ہونے والے فل کورٹ ریفرنس میں شرکت نہ کرنے کی وجہ بتا دی ہے ۔
جسٹس منصور علی شاہ نے رجسٹرار سپریم کورٹ کو لکھے گئے خط میں کہا کہ میں نے اوور سٹیپنگ پر سابق چیف جسٹس ثاقب نثار کا ریفرنس بھی اٹینڈ نہیں کیا تھا ، چیف جسٹس قاضی فائز عیسیٰ کا ریفرنس بھی اٹینڈ نہیں کروں گا، چیف جسٹس کا الوداعی ریفرنس اٹینڈ نہ کرنے کی وجوہات مزید پریشان کن ہیں، چیف جسٹس کا کردار عوام کے حقوق کا تحفظ ہوتاہے ، چیف جسٹس کا کام عدلیہ کا دفاع کرناہے ، دنیا بھر میں جانے والے چیف جسٹس کو الوداعی تقریب دینے کا رواج ہے ، جانے والے چیف جسٹس کی خدمات کو الوداعی تقریب میں سراہا جاتاہے ۔
فل کورٹ ریفرنس سپریم کورٹ کمرہ عدالت نمبر ایک میں ساڑھے دس بجے شروع ہوا جس میں چیف جسٹس قاضی فائز عیسٰی اور نامزد چیف جسٹس یحییٰ آفریدی سمیت سپریم کورٹ کے دیگر ججز شریک ہیں۔سینئر جج جسٹس منصور علی شاہ رخصت پر ہونے کی وجہ سے فل کورٹ ریفرنس میں شریک نہیں ہیں۔
اس کے علاوہ جسٹس ملک شہزاد، جسٹس اطہر من اللہ، جسٹس منیب اختر اور جسٹس عائشہ ملک بھی ریفرنس میں شریک نہیں ہیں۔
